Omaulikilo gIipindi ga Ndjiva omo mwedhi nguka

OMAULIKILO giipindi ga Ndjiva moAngola, otaga tameke mEtitano lyoshiwike tashi ya, omunashipundi gwEhangano lyAanangeshefa moNooli, Thomas Iindji a yelitha omasiku ngaka.

Iindji, ta ti aanangeshefa, unene tuu mboka aashona mboka ya hala okuka ulika nokulanditha iinima yawo naya ninge ekwatathano nombelewa yaanangeshefa ndjoka tayi adhika mOsenda yOmaulikilo gIipindi mOngwediva opo ya longekidhilwe olweendo lwawo nokukakala kwawo kOndjiva. Shika oshikando oshititatu nenge oshitine lwaampoka, aanangeshefa ya Namibia taya kutha ombinga momaulikilo giipindi ga Ndjiva moshitopowla sha Kunene mo Angola. Iindji ota ti, ayehe mboka taya yi ye li kohi yEhangano lyAanangeshefa otaya kala nokupopilwa ko kEhangano lyawo, ihe mboka taya yi kuyoyene otashi ka kala oshidhigu okupopilwa ko kEhangano lyAanangeshefa molwashoka oya yi ko nomulandu gwawo yene.
Iindji, okwa li noshigongi shaanangeshefa mosenda yOmaulikilo gIipindi ga Ngwediva ,moka aanangeshefa ya lombwelwa nawa nkene omalandulathano ge li notaga ka kala. Omusamane Iindji okwa indile aanangeshefa mboka taya yi hoka ye kiihumbate nawa, oshoka oye li moshilongo shaantu noya tegelelwa nee ya gandje oshiholelwa oshiwanawa. Omaulikilo ngaka ga Ndjiva, otaga tameke nee meti 16 Juli 2010 notaga ka kala ko sigo eti 16 Auguste 2010.