Omaulikilo gIipindi ga Ndangwa ga tameke

OMAULIKILO gIipindi gokomumvo ga Ndangwa oga tameka,naanangeshefa oyendji oya kutha ombinga momaulikilo ngaka, taga ka ningilwa Posenda ompe yOkuulika Iipindi mOndoolopa ya Ndangwa ndjoka ya egululilwe ku Gavena gwa Shana, Klemens Kashuupulwa meti 3 Juni 2011.

Pethimbo lyEegululo lyOsenda ndjoka ompe yIipindi mOndangwa, tayi adhika pooha dhOfaabulika yOomeme yOmagongo yedhina Eudafano, Meya gwOndoolopa ya Ndangwa,Ronny Negonga, pashipopiwa she shoka sha leshelwe pehala lye ku Kaansela, Christian Iitope, okwa ti kutya omaulikilo giipindi gokomumvo ga Ndangwa otaga ka kala ko okuza meti 24 Juni sigo 2 Juli 2011 mehala ndyoka epe lyokuulikila Iipindi yokomumvo,nokwa tegelelwa aanangeshefa nOokampani odhindji dhi ka kuthe ombinga momaulikilo ngaka. Negonga ota ti Ondangwa okuza tuu pethimbo lyOndjondjo oya kala yi na lela oompito oombwanawa dhokungeshefa onkee oshi li oshiwanawa okukala aluhe taku ningwa iikonga yokuuvitha ko ongeshefa mOndangwa. Negonga ta ti okuninga ano omaulikilo gIipindi ngaka mOndangwa osho omukalo gwokuninga iikonga yokuuvitha ko oshigwana kombinga yongeshefa noku shi uvitha ko wo kutya oongeshefa nenge uunangeshefa mOndangwa, inau hulila ashike mOndjondjo, ihe otau tsikile natango, shi vule po nokuli. Negonga ta indile kAanangeshefa nokookampani dhi kuthe ombinga momaulikilo giipindi neitulomo enene. Ta ningi wo ehiyo koshigwana sha Ndangwa nayalwe moNamibia, unene tuu mOndangwa nomOshitopolwa ashihe sha Shana nomuushiinda washo, ye ya talele po omaulikilo ngaka nokutala shoka tashi ulikwa mo nenge tashi landithwa mo. Sho nee ta egulula ehala ndyoka lyOmaulikilo esiku ndyoka, Gavena Kashuupulwa okwa ningi ehiyo enene e li ukitha maanangeshefa yomoNooli moka kutya naye ye ya kuthe ombinga momaulikilo ngaka. Ashike nee , okwa ningi ekunkililo e li ukitha maanangeshefa kutya, sho nee taye ya okuulika iilikolomwa yawo yopaunangeshefa ngeyi, naya ninge wo omakwathano, ano naya pange uukuume noombushe miilonga nAanangeshefa yopondje yoshitopolwa nenge yoshilongo mokutula po oongeshefa dhopafaabulika, ndhoka tadhi vulu okukuta aantu oyendji miilonga nokuyambula po emona lyoshilongo. Kashuupulwa ta ti emona lyoshilongo itali vulu okuyambuka po ngele oyendji yomaakalimo kaye na iilonga. Onkee ta indile nee ngawo kaanangeshefa aanene naashona yi itule kumwe noya ninge po oofaabulika ndhoka tadhi vulu okuyambula po emona lyoshilongo nokukuta wo aaniilonga oyendji. Pethimbo olyo tuu ndyoka, Omunashipundi gwOkomitiye yokuyambula po Emona mondoolopa ya Ndangwa, Prins Shiimi, okwa pandula sho Elelo lya Ndangwa lya eta po ehala ano endiki lyomaulikilo gIipindi gokomumvo gaNdangwa opo aanangeshefa, unene tuu mboka yomOndangwa mOshana, ya vule okuulika iipindi yawo nawa momundhingoloko gu li nawa nogwaandjuka nawa. Ota ti aanangeshefa yamwe mOndangwa nuumvo oya dhengwa ya lila kefundja, ndyoka lya yonagula po oongeshefa dhawo dho oondjila nadho tadhi yonagulwa po komeya gefundja, yo aanangeshefa yamwe taya pata nokuli omolu omeya ga ya mOositola dhawo nokuyonagula o nayi kumwe niilandithomwa yawo. Shiimi ta pandula aanangeshefa mboka ya kwathela aakwashigwana yakwawo mboka ya li ya monithwa iihuna nayi komeya gefundja. Ta indile a mana mo koshigwana sha Ndangwa kumwe nElelo lyasho ya longele kumwe mokuyambula po emona lyondoolopa yawo, unene ya longele kumwe miinima ngashi mbika yomaulikilo giipindi nosho tuu iikwawo oyindji ya nika okuhumitha komeho ondoolopa yawo. Ta ti Ondangwa ndjoka yi li wo omweelo okuya kIitopolwa iikwawo, na unene tuu koAngola, oyi li ponkalo ombwanawa lela yokwiiyambula po pamona, oshoka kehe gumwe omOndangwa teendele. Shiimi ta indile kElelo lya Ndangwa li tale koshigwana shalyo shoka tashi ende tashi indjipala, kutya osha pumbwa omahala gokukala. Shiimi ta ti, nonando Omaulikilo ge li manga petameko, omvula tayi ya otaga ka kala ga longwa mo nawa naangoka te ke ya ko otaka mona kutya, eeno pwa longwa sha shomupondo mpaka. Shiimi ta ti, omaulikilo gIipindi ga Ndangwa oge lile po wo okutula kumwe oshigwana sha Ndangwa nokutunga mu sho ombepo yuumwayinathana noshowo okukaleka po ondjokonona yaNdangwa ya kola noyi li ngashi yi li. Ta ti aayehe ye limo, aaluudhe naatiligane, naya kale mombepo yimwe yuumwayinathana nonelalakano limwe lyokuyambula po Ondangwa nEmona lyayo.