Omaso momeya poHardap taga eta omaipulo

OMIYALU dhopolisi moshitopolwa sha Hardap odha ulike kutya aantu ya hamano oya sile momukanka gwokutekela piilonga yokutekela ya Hardap pokati ka January 2010 sigo oJuni nuumvo.

Omukuluntu gwopolisi moshitopolwa shoka, Komufala, Kobus Meyer okwa ti eso lyngashingeyi ndyoka lya lopotwa olya, Jeremia Swartz [51] ngoka aadhika asila momeya gomukanka ngoka Etitatu lyayi. Swartz ota ku tiwa okwa thigipo egumbo lye otundi onti 16h00 komatango aniwa a ka landithe omakende. Omudhimba gwe ogwi itsuwa momukanka ongula yesiku lya landula. Omukanka ngoka ota ku tiwa ogo omule noometela mbali okuuka mevi, pahapu dha Komufala Meyer. Okwa ti miiningwanima oyindji yomaso uukolwe owo wa pewa ombedhi.Meyer okwa ti onkambadhala odha ningwa oku keelela omaso ngaashi okutula omukanka molugumbo,ndele nduka olwa tetwako kaakwashigwana konima ashike yokathimbo.Opwa li pena oonkundathana ando pu tulwe oolamba dha kundukidha omukanka ndele ndhika ina dhi tulwa miilonga.Ngoloneya gwa Hardap, Katrina Hanse Himarwa sho a popi omaipulo ge koshinima shika okwa ti osha pumbiwa pu kongwe omukalo ta gu longo oku keelela omaso ngoka.Oshoka pethimbo ndika kapena ondungedhiladhilo ndjoka tayi keelele iiponga mbyoka. Onkene eso lyomomeya pehala ndyoka oshinima tashi eta omaipulo omanene, naayehe ya gumwa kugo oya pumbwa oku ya pamwe noku konga ethaneko ndyoka tali ga mweneke. Okwa indile aakwashigwana opo ya kale ya kotoka uuna ta ya ende pomukanka mpoka.