Omanima taga li po iikombo yaantu muuzilo wa Ngwediva

MOMIKUNDA Ohaushombo noshowo Oikango, Okahenge nomomikunda dhomomudhingoloko popepi nOngwediva mOshitopolwa sha Shana ohamu ya omaima, yamwe taya ti kutya aniwa oongwe tadhi li ko iikombo yawo kiigunda uusiku.

Aakalimo yomomikunda ndhoka noonkwawo dhi li momudhingoloko omathimbo agehe ngaka ga zi ko, oya kala noye li taya lili omanima ngoka, hage ya ashike uusiku miigunda yawo nokulya mo iikombo yawo.Gogene omanima ngaka ohaga lumata iikombo moothingo, momiligu nokuthipa mo ombinzi, go wo taga li ko iishawo yiikombo. Taga vutula mo omala nomandjandja giikombo nokunwa mo ashike ombinzi. Iikombo mbyoka tayi adhika nuukombwena, uukombwena ohage wu tapa mo miivalelo yooyina noku wu thiga mpoka. Kage wu lya.Aakalimo otaya ti kutya oga fa ge na mwene, moka haga zi momikunda dhawo moka. Ashike inaya lombwela Oshifo shika kutya mwene gwago olye naanaa.Okupendukila nee ongula yOlyomakaya ngaka ga zi ko, omanima ngaka ogiiteyele moshigunda sha meekulu Justina Shimakeleni, a tseyika wo nawa nedhina Mukwahepo momukunda Ohaushombo nokudhipaga mo iikombo iyali, mwa kwatelwa shimwe sha li oshisimba. Okakombwena kasho oge ka tapa mo noku ka ekelahi momudhingoloko gwoshigunda. Meekulu Mukwahepo ota hokolola kutya ongulohi ndjoka, okwa lala ku na ombepo, na ina uva sha shiikombo tayi lili ngeno koshigunda, shoka shi li ngaa oometa dhontumba okuza pegumbo mepya, ashike meme, gwegumbo li li puushiinda she ota hokolola kutya okwa uva iikombo tayi lili.Omanima ngoka sho ge ya poshigunda shiikombo ye mpoka nokugwayela mo, oga kwata mo nee iikombo iyali iikiintu, tage yi kutha ko koshigunda noku yi kokololela kokule kashona noshigunda negumbo hoka ge yi dhipagele nokulya mo ombinzi, ko okakombwena tage ka ekelihi pomudhingoloko mpoka. Omanima ngaka oga yi puushiinda sha meekulu Mukwahepo, ano ga yi moomeekulu Cecilia Ashipala noshowo moomeekulu Asteria Shilongo yomOkahenge moka wo namo ga li mo iikombo. Iikombo ayihe mbyoka ya dhipagwa komanimma ngaka momagumbo ngoka gatatu, okupendukila ongula yOlymakaya ga zi ko, oyi li omugoyi kumwe nuukombwena ,wayo mboka wa tapwa mo momala komanima ngaka, omanga pu na yimwe ya lika nokuthipwa ombinzi ya thigwa ashilke mpoka yi na omwenyo.Ashike otaku popiwa wo kutya omasiku ga zi ko, omanima ogo tuu ngoka oga li ga li po wo iikombo ya meme Albertina Hangula noya tate Abner Paulus yomomukunda Omashekediva popepi na Haushombo nOkahenge mpoka, ano muuzilo wa Ngwediva. ‘ Omanima ngaka oga kala po ethimbo ele pomikunda dhetu mpaka noga yeleka iigunda yiikombo yaakalimo oyendji.Katu na we iikombo, ya lika po komanima ngoka, ‘ Aakalimo taya lombwele The Namibian ngawo ongula yOlyomakaya ga zi ko nokugwedha po kutya uupyakadhi mbuka oya kala taye wu lopota kooyenene yomikunda dhawo noshowo ku Kaansela gwawo ndele,molwashoka iinima oya nika Oshiwambo, kapu na ngoka a hala okuya mo muupyakadhi mbuka. Kehe gumwe ota kembadhala ashike oku wu henuka nomukalo omwaanawa.Komanda gwOpolisi ya Shana Komufala gwOpolisi Ndhangwapo Kashihakumwa, ongula yOlyomakaya ngoka ga zi ko, okwa tumu ko etanga lye lyOpolisi, li li mewiliko ly Inspecta Wit kOmanda gwOsasiona yOpolisi mOngwediva, li ka tale shoka sha ningwa po.Sho Opolisi ndjika ya thiki mpoka, oya adha iikombo ya lala kwali apehe mpoka ya lika nokudhipagwa komanima ngoka. Aapolisi oya li ya kumwa ko shili, oku shi mona, noya yi mokashoko, taya landula omakaha gomanima ngoka ga thinda momikunda dhomuuninginino wa Haushombo, ano ga thinda lwokOngwediva lwaahoka momukunda Oikango popepi nOngwediva.kEpulo, Komufala Kashihakumwa okwa lombwele The Namibian ongula yohela kutya Opolisi ye ya li ku konga mOlyomakaya moka, inayi mona po sha. Ashike ekonaakono onkee tali tsikile. Aakalimo yomomikunda moka oye uvite uudhigu uunene, noye na aniwa edhilaadhilo lyokukaninga ehololomadhilaadhilo muule womasiku twa thinda .’Aaye, otatu monithwa unene iihuna komanima ngaka notwa tila kutya shampa inapu ningwa sha ndele taga mana po iikombo yetu,otashi vulika, ga ka pilukile moondjuhwa dhetu, nokuza mpoka omutse, ano maantu momwene,’ aakalimo yamwe taya ti ngawo nokwiindila kooyene yomikunda, ku Kaansela nokOpolisi, ano kEpangelo, ya tale oshinima shika muule nokweeta po ekandulopo lyomukundu gwasho meendelelo ngeno ngashi tashi vulika’. Miikombo yetu moka,omo tatu kutha okamaliwa koku tu hupitha kumwe nomaluvalo naatekulu yetu, nange iikombo yetu otayi lika po ngawo pwaa na esilohenda, otatu ka hupa ngiini yakwetu.Yakwetu natu popilwe moshinima shika,’ meekulu Asteria Shilongo ta ti ngawo neyeme nokugwedha ko ta ti, oya hala Opolisi yi ya kwathe , yi landule omanima ngoka nokuungaunga nago ngashi tashi vulika.