Elelo lopamufyuululwakalo laNdonga ola yandja omaliudo kombinga yokuhombola ombada moNamibia.
Omupopiliko welelo lopamufyuululwakalo laNdonga Frans Enkali okwa ti elelo otali ya mbidida okuhombola ombada kupikwe paveta shaashi kashi shi oshinima shipe momufyuululwakalo wavo.
“Momufyuululwakalo wetu wOvafrika, kapu na sha shapuka mokuhombola ombada shama ashike kutya otashi ningwa kovanhu vakula ve shi eshi tava ningi. Eshi oshinima osho kwa li hashi ningwa kootatekulululwa,” Osho a ti ngaho.
“Opyakadi paife ngee ovanhu tava popi okuhombola ombada, ohava eta mo oinima yomaitavelo nomaufemba ovanhu. Omolwashike? Eshi eudafano nomufyuululwakalo.”
Enkali okwa ti nande ngeno okwa li okuhombola ombada ku li paveta, hamulumenhu keshe ta hombola ovakainhu ve dulife puumwe.
OSHIBOFA OTASHI PATULULWA
Omundjadjukununi woikwapolitika Rui Tyitende okwa ti ovamenhu ovo vehe na oshimaliwa sha wana itashi dulu okuwanifila po ovakulukadi ve dulife puumwe inava kufa ombinga meehombo dombada. Oshinima eshi oshe ya konima ehangano lopaveta ledina Kadhila Amoomo Legal Practitioners la holola kutya oli na ondunge yokutwala oshibofa komhangu yopombada momwedi tau ya tashi popile okutula eehombo dombada paveta.
Tyitende, oo a waimina oshibofa shaAmoomo ongomuningi weindilo, okwa ti okuhombola ombada ehoololo nosha pumbwa ashike okuningwa kovalumenhu ovo ve na oshimaliwa sha wana nosho yo omaukwatya e li nawa opamadilaadilo taa dulu okukala novakulukadi ve dulife puumwe.
“Ngee owa hepa noho kala alushe uhe na sha, kala kokule nokukendabala okuhombola ovakulukadi ve dulife puumwe shaashi oto wedele oluhepo moNamibia,” Osho a ti ngaho.
Tyitende okwa ti okuhombola ombada oshinima sha kala hashi ningwa nosha kala shi ya di mo momufyuululwakalo nomoshiwana shAfrika.
MoNamibia paife, okwa ti, omu na ovalumenhu ovo ve li meehombo oombali notava file oshisho omaumbo oo avali.
“Ashike nee, ovakainhu ava kave li mongongahangano notava mono oixuna shaashi voo nounona vavo ihava mono ohole okudja komushamane ile kuxe. Voo natango inava amenwa koveta ngee tashi ya komafyuululo nokuwanifila po ounona vavo,” Osho a ti ngaho.
Tyitende okwa ti ovakainhu ava otava yolwa nokulengifwa koshiwana, nande nee ekwatafano oli li paudafano.
“Onghee nee, okutambula ko ombada paveta otaku va pe eameno panghalafano, paveta nosho yo pamaxupilo. Shitiwa, eehombo dombada otadi ningwa nale, oshe shi ashike ovakainhu ohava kala va hala okushilikala shaashi ova tila okulengifwa moshiwana,” Osho a ti ngaho.
Tyitende okwa ti okwa mona eengodi mbali nomavatelo opashimaliwa okudja keeminista mbali dakula nosho yo ovakulunhuwiliki vomahangano epangelo ve li vatatu, ovo ita tumbula komadina opo oshibofa eshi shi ye komesho.
“Otashi kulombwele ashike kutya oshinima eshi osha fimana ngahelipi, ashike ovanhu ova tila okukundafana oshinima eshi,” Tyitende osho a ti ngaho.
Natango okwa ya mbidida ovakulukadi va kale ve na ovashamane ve dulife puumwe.
“Ngee ovakulukadi ova hala ovashamane ve dulife puumwe, nava kale ve na emanguluko ve shi ninge,” Osho a ti ngaho.
“Nopefimbo lootatekulululwa, ovalumenhu okwa li ashike hava kufa ovakulukadi ve dulife puumwe ngee okushi kutya ota dulu okuvayambidida aveshe,” Enkali osho a ti ngaho. Ashike, nande ongaho, okwa ti oshinima shovakulukadi ve na ovashamane vavali ile ve dulife po inashi ningwa mo nale momufyuululwakalo moNamibia. “Mutu omifyuululwakalo dikwao oda kala nokushininga, ashike kashi shi omifyuululwakalo daNamibia.
Onghee nee, itandi yambidida oshinima shi li ngaho,” Osho a ti ngaho.
Eshi kwa li ta popi ponhele yelelo lopamufyuululwakalo lOvaherero omunandjungu Hijangaruu Veseevete okwa ti okuhombola ombada okwa kala haku ningwa moshiwana shOvaherero.
“Kwaame, kakwa li epulo ngee ohandi shi yambidida ile itandi shi yambidida. Eshi oshinima nda kala ndi shi shi kutya osha kala nokuningwa momufyuululwakalo wetu. Oshi li ombinga yokukala kwetu, noshi li oshinima hashi ningwa mokati ketu,” Osho a ti ngaho.
“Ongomukulunhu, ohandi kala nda ngwangwana ngee ndi wete oinima oyo hai ningwa momifyuululwakalo detu ya talika ko kutya kai li nawa papangelo.”
Veseevete okwa ti nande ke li naana ominge novakulukadi ve na ovashamane vavali ile ve dulife po, inashi ningwa mo nale momufyuululwakalo waye.
“Momufyuululwakalo waAfrika, ovakainhu ihava hombola ovalumenhu. Ovalumenhu ovo hava hombola ovakulukadi. Mutu ohashi ningwa momifyuululwakalo dimwe muAfrica, ashike kashi shi moNamibia.
“Ashike, ngee omukainhu okwa hala okuninga ngaho, ohandi ti na twikile na sho. Ndee ngee omulumenhu okwa hala okuhombolwa komukainhu, naye komesho. Ashike inashi ningwa nale,” Osho a ti ngaho.
Omunawino moinima ya pambada omakwatafano opanghalafano Ngamane Karuaihe-Upi okwa ti okuhombola ombada inaku pumbiwa moNamibia, ashike ngee eehombo dovanhu voukakwashikekookanhu umwe otadi tambulwa ko paveta, neehombo dombada nadi tambulwe ko.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
