Omakankameno goEU otaga nikitha oluhodhi

O
MUPERESIDENDE Hifikepunye Pohamba okwa yeleke omaihumbato gehangano lyuukumwe waEuropa moonkundathana dhomalanditho na Namibia nomasiku gokatongotongo, ta ti iilongo mbika ota yi tindi okulonga na Namibia ongo oshilongo shithike pamwe nayo oshowo inaa yi hala okupulakena komakemo ga Namibia kombinga yiinima yimwe moonkundathana ndhika dhi na sha nelongelokumwe momahupilo.

Pohamba oohapu ndhika okwe dhi ti konima yoonkundathana dhawo nomuleli gwa South Africa omusamane Jacob Zuma moPretoria.Okwa ti iigongi oyindji oya ningwa na Namibia okwa gandja omaiyuvo ge. ‘Iilongo mbika oya li yi na okupulakena komadhiladhilo ga Namibia noshowo komakemo ge kombinga yoshikalimo sheuvathano ndika lyaEPA. Ndele osha fa mbaka inaa yahala okupulakena, naashika otashi etitha olukeno nokwaana mbili.,’Pohamba ta ulike. Omupresidende okwa ti omauvathano oga pumbwa okwaadhika kiilongo yi li pomuthika gumwe konima yoonkundathana.’Otu uvite oEU iha yi kundathana natse pamuthika guthike pamwe.Na otuuvite kutya oonkundathana ndhika ota dhi ningwa mombepo yomo 1960.Oohapu dha Pohamba dho ngashingeyi odha kukuta okuyeleka nekankameno lye lyopetameko lyonuumvo unene tuu sho a li ta popitha oshigwana muApilili . Pethimbo ndiyaka okwa tile iinima yimwe mbyoka inaa yi pwa natango oya pumbwa iilonga oyindji opo yimonenwe ethikilo.Namibia na South Africa oyo ashike iilongo iyali mbyoka ina yi shaina natango omauvathano longelokumwe giipindi noEu .Pehulilo lyo 2007 Namibia okwa li a shaina euvathano lyopakathimbo okugamena elanditho lyonyama, oohi nomandjembele koEuropa pwaana ofuto yiifendela yokutuminamo.Ndele endangalati oli li mpoka kutya omauvathano ngaka ota ga ka nkundipika ompito ye hengumukilo mumwe lyiilongo yoSADC noshowo oompito dhoku uvathana iipindi niilongo yilwe yokuumbugantu ngaashi Brazil na China .Namibia ina nyanyukilwa woo sho Eu inaa hala oku gandja ekwashilipaleko kombinga yegameno lyiikulya noshowo einyengo lya manguluka lyiinima tashi ningwa pamishangwa.’Natango ota tu pula EU a pulakene’ osho Pohamba a ti.Ombelewa yomusamane Zuma momushangwa guukumwe oya ti iilongo mbika iyali oya endulula omakankameno gawo kombinga yoonkundathana dhomahupilo mokushitalela kehengumukilomumwe lyoshitopolwa sha SADC. Aaleli mbaka yaali oya zimine natango ya tsikile noonkundathana noEU kombinga yoshinima shika.Aaleli mbaka oya koleke woo eitulemo lyawo okuhumitha komeho enkondopeko lyuukumwe wAfrika.Oonkundathana pokati ka Eu na Namibia kombinga yomahupilo odha eta ehilathano pokati koshilongo shika nehangano ndika.