Omaishangitho ota ga ende nawa

OKOMISI yomahogololo yaNamibia oya potokonona uupyakadhi mboka ya li ya tsakaneke petameko lyomaishangitho gaahogololi ga gwedhwa po oshiwike shayi.

Ngashingeyi ayihe ota yi ende nawa.’Indeni mu ki ishangithe momwaalu omunene,’ndika olyo etumwalaka lyomuwiliki gwo Komisi yomahogololo omusamane Moses Ndjarakana.Okwa lombwele oThe Namibian ta ti,iipumbiwa ayihe ngashingeyi oya gwana po, no ma hala agehe gomaishangithilo oga kala ta ga longo nawa okuza metitano lyoshiwike sha yi.Aakwateli komeho yomaishangitho miitopolwa ayihe oye li mewiliko lyonkalo pomahala gawo.’Ngaashi sha li sha tseyithwa metitano egandjo lyiipumbiwa olya li ,lya yi wa moshipala konkalo ya li yaa shi kupangelwa kOkomisi yomahogololo,’ Ndjarakana ta ti .Onkalo ndjika oya li moSouth Africa moka mwa li ekanka lyaaniilonga yiifendela oku za mu 7 sigo 15 Septemba, noshitopolwa sha li sha gumwa unene oshoka sho piiyelo yopoongamba.Shika pamwe negandjo lyiiyenditho ndyoka lya li woo lya ende kashona, osho sha ningitha opo aanambelewa ya kale ina ya thika mbala pomahala gomaishangitho metine ngaashi ya li ya tegelelwa.Ndjarakana okwa ti ekateko moku thikitha mbala iipumbiwa yomaishangitho gomahogololo ita yi ka kutha sha mondjato yoKomisi yomahogololo, oshoka oshiningwanima shika oshaa adhika nale sha kwatelwamo meuvathano ndyoka oKomisi ya ningi noo na ku gandja iipumbiwa.Aaishangithi oye na ethimbo sigo 30 ga Septemba okwii shangitha ongaa hogololi.Pethimbo omaishangitho ga tameke noonkatu oontshona oongundu dhimwe dhopolitika odha li dha indile opo pu gwedhwe esiku limwe molwaa, ndyoka lya kanithwa koshinima shika.Ndjarakana okwa yamukula mboka ya pangula Okomisi kutya’Okomisi yomahogololo ota yi vulu oku ninga omahogololo ga manguluka, ge li nawa na oga eguluka, shampa ashike omahogololo ta ga kala oshinakugwanithwa shomukwashigwana kehe, ndele haashoka owala shOkomisi yomahogololo oyo ayike.’Okwa gwedha ko ta ti Okomisi oya simaneka oshinakugwanithwa shiikundaneki, noshowo shomahangano gaakwashigwana noongundu dhopolitika ongo ooihoontali yomalongekidho’ okwa indile iikundaneki yi shange woo kombinga yiinima iiwanawa no ta yi tungu mbyoka ya longwa koKomisi yomahogololo.’Natu simanekeni oomvula 20 dhomahogololo ga manguluka, pa ku ulika ombepo ombwanawa pa ku kala tu na eitaalo momukalo gwomahogololo ngaka’ ta indile ngaaka.Omahogololo gotango ga Namibia mondjila yokuya kemanguluko oga ningilwe mu Novemba 1989.’Omishangwa nomanyolo gompinge kombinga yomahogololo ota shi sitha aaishangithi uunye opo ya kiishangithe noshowo ya ka hogolole,’ osho a ti, ta gwedha ko ta ti omanyolo ga tsompinge ota ga nwethamo aaishangithi unene mboka aagundjuka.Kombinga yaagundjuka okwa ti oku na oshimpwiyu kutya yamwe unene tuu mboka ya valwa pethimbo lyemanguluko, ita ya iinyolitha opo ya ka hogolole, ta ti omakonakono ga li ga ningwa kOkomisi yomahogololo ngoka ga ulike kutya okwaa hena uumutse nenge omishangwa dhimwe dhopashigwana okwo oshiimbi shimwe shaagundjuka oku ishangitha.’Shika oshinakugwanithwa neipulo enene lyoshigwana ndele ka li shi ashike eshongo lya taalela Okomisi yomahogololo oyo ayike’.Oshiimbi shimwe sha taalela omaishangitho gaahogololi osho, okuhuhwa kwaa hogololi, sha etwa kombinga yimwe molwaashoka ka yena uumutse.’Otu na okulongela kumwe no ku yambidhidha omahogololo gokutothamo aaleli yetu, molwaashoka shika oshi li muuwanawa woshilongo shetu shoka natango oshigundjuka pa u demokoli,no ta shi lalakanene oku ya pondondo yopombanda muudemokili.