Omaishangitho oge li pokuhula

AANTU 141 000 oyi ishangitha uule wiiwike iyali omolwa omahogololo ga Novemba nuumvo.

Omiyalu ndhika odha tseyithwa kOkomissi yomahogololo ya Namibia metiyali. Omuwiliki gwoshikondo shomahogololo omusamane Moses Ndjarakana okwa ti omaishangitho gagwedhwa po oga eta omwaalu gwaahogololi sigo oopaantu omiliona 1,14 moshilongo.Omaishangitho oga li ga tegelelwa ga hulile potundi ontimilongo mbali nayimwe ongulohi yetitatu ngele ka pwa li we etokolo okuga lelepeka.Ndjarakana okwa ti oya longitha omiyalu dhopashigwana oku tengeneka kutya aantu ye thike peni ta ya ishangitha uule wiiwike mbyoka iyali.Pamiyalu ndhoka okomisi yomahogololo oya li ya tengeneke kutya aantu konyala 200 000 oya li ye na okwiishangitha.Omwaalu nguka gwaanyolwa 141 000 inagu kwatelamo mboka yi inyolitha mErongo molwaashoka aanambelewa oya li natango yi ipyakidhila noku talulula omiyalu dhawo, omanga mOshana omiyalu ina dhi kwatelamo mboka yi ishangitha konima yomi 23 ga Septemba nuumvo.Omiyalu ndhika odha li dha hulile okuyalulwa sigo omosoondaha ya yi.Ndjarakana okwa ti aantu 25 600 oyiishangitha moKhomas, 22 900 mOhangwena, 15 548 mOkavango omanga oHardap yi na omwaalu omushona gwaa ishangithi ye li 5 067.Patengeneko lyo komisi yomahogololo oshitopolwa sha Khomas oshi na aahogololi 190 967, sha landulwa kOhangwena yina aahogololi 132 798, Omusati omutitatu naahogololi 128 026, oshitopolwa shaKavango oshitine naahogololi 119 264.Omiyalu odha tegelelwa okulunduluka unene konima omaishangitho ngele gapata metitatu, nongele omiyalu dhErongo nOshana odha gwedhwa ko.