Omainyolitho guukalata womahogololo ga katekwa

ESHANGO lyOmainyolitho ga gwedhwa po guukalata womahogololo ina ga tameka pethimbo esiku ga li ge na okutameka 17 Septemba.

Omaishangitho oga li ga tindila mo yimwe molwaashoka iikwaniipangitho, inayi thika mbala okuza hoka ya landwa, ngaashi ko South Africa nosho tuu.Kakele kiikwaniipangitho, The Namibian oya kundana kutya iihauto yoyene oya kala inayi gwana, omanga mbyoka hayi hili akuhe, yokuya komahala gomithitu nominoko, ya kala wo ka yi po nawa.Nande ongawo, Omukuluntu gwOmainyolitho ga gwedhwa po moShana, meme Ndilimeke Mavulu, okwa lombwela The Namibian mOshakati kutya, ku yo, ayihe oyi li nawa nomelandulathano nonande ina ya tameka pethimbo. Nande ongawo okwa zimine kutya etokelo olya etwa kiikwaniipangitho ina yi thika mbala, ashike okwa ti yo mOshana kaye na uupyakadhi kombinga yiiyenditho.’No nande inatu tameka pethimbo, oshinima omainyolitho ga gwedhwa po, notu wete kutya omasiku ogendji nawa notatu ka adhika twa mana okunyola ayehe mboka ya pumbwa okunyolwa sho tatu ka thika pehulilo lyOmwedhi nguka, ‘meme Mavulu ta popi ngawo nomukumo.The Namibian, okwa kundana kutya pomahala gomainyolitho opwa kala aantu oyendji ya tegelela yi inyolithe, sho omiyelo dhomahala ngoka dha eguluka. Ashike nonando aaniilonga yamwe ya li ya thika pethimbo, inaya vula okutameka okushanga aantu mboka, molwashoka iipumbiwa yo ku nyolitha kaya li po.