Omainyolitho gaahogololi ga tameka nevundakano

AAHOGOLOLI oya li ya geya, omukuluntu gwoKomisi yOmahogololo moNamibia, Moses Ndjarakana tati, ta yamukula kepulo kombinga yaantu nkene ya taamba ko etameko lyomainyolitho gagwedhwa po lyomahogololo ndjoka lya tameke nuunkundi momasiku 17 ga Septemba 2009.

Pomahala gamwe omaishangitho ina ga tameka nande nande esiku ndyoka. Sigo ometine iipumbiwa ngaashi ooprinta dhokunyanyangidha uukalata womahogololo noshowo konyala etata lyiiyenditho oma 716 mbyoka ya pumbiwa oku fala iipumbiwa komahala gomainyolitho ka ya li ya thika kaanambelewa natango.Ndjarakana okwa gandja uusama kekankana lyaaniilonga yoshikondo shiifendela sha South Africa pokapale koondhila ka Oliver Tambo onga shimwe shomiikateki yethiko lyiipumbiwa.Okwa ti woo egandjo lyiiyenditho ta li ende nga thimbithimbi na lyo olya gwedha ko koshinima shika.Aantu omayuvi koombinga dhoshilongo oya li ya adha omahala mpoka ye na okwii shangithila gaana aanambelewa.Omutseyipolitika gumwe okwa ti oshinima shika shevundakano ota shi vulika shika kothe oECN oodola oma 500 000 okweeta mo iipumbiwa yimwe ta ya longitha ondjila.Ndele Ndjarakana okwa ti shika ita shi ningwa molwaashoka omahangano ngoka ogo ta ga gandja iipumbiwa mbika ogo taga futile okweenditha iinima mbyoka.’Otu shi shi kutya aantu oyendji oye ende oondjila oonde opo ye kiishangithe, onkene otatu gandja ombili.’. Ndjarakana tati. Oshinima shika ota shi opalekwa. Oongundu dhopolitika nadho odha tseyithilwa oshinima shika.Omalimbililo ga dho ogo ashike ngaka kutya ethimbo ota li ka kala tuu lya gwana opo kehe gumwe iishangithe? No showo elandulathano lyaahogololi li nyanyangidhwe mbala , opo li vule oku konakonwa.?Petameko omainyolitho ngaka oga li gena oku hulila mo30 ga Septemba 2009, nekonakono lyelandulathano lyaahogololi okwa li li na oku ningwa mo 12 sigo 16 ga Kotoba 2009.’Otu na iiwike iyali opo tu opaleke epuko ndika, ndele ota tu tala nawa onkalo nopamwe, noongundu dhopolitika ota tu tala ngele pamwe ota tu gwedha ko kaanambelewa nenge ota tu gwedha kootundi ndhoka aanambelewa ye na okulonga.’ Ndjarakana ta ti.Iikandjohogololo oyindji oya li inaa yi mona natango iipumbiwa yayo sigo ometine, naanambelewa oya kala ashike ya kuutumba pomahala gomaishangitho ya tegelela iiyenditho opo ya kashange aantu.’Otwa taamba, iiyenditho kashona nakashona okuza kUuministeli wIiyenditho, ndele ngashingeyi onkalo oya hwepopala, na otwa tegelela yi ninge ombwanawa ngele iiyenditho oyindji oya thiki.Ndjarakana ta ti ngaaka uuvite nayi.Okwa ti oya taamba oongodhi kaaishangithi ya geya, ndele yo ka ya li ye na shoka ta ya vulu shaashi iikaha ya wo oya li ya fa ya mangwa.Reginald Roman, omuleli gwaagundjuka ya United Democratic Front okwa ti aantu yoko Khorixas, Kamanjab, Epupa, Opuwo no Sesfontein oya li ya geya noonkondo.Yamwe ngaashi aaniilonga yomoofaalama oya kutha omafudho gowina opo ye ki inyolithe ndele oya shuna iikaha yowala konima sho ya tegelele ethimbo ele inaa ya mona nando omunambelewa gumwe.’Epulo olyo ndyoka kutya aanambelewa yoECN ota ya ka tula po esiku lya gwedhwa po molwaashoka esiku lyotango olya yonagulwa,’Roman osho a pula.Ngaashi omuvalwa konima yemanguluko a li ena okushangwa lwotango ye okwa li a nyanyukwa, ndele okwa li a shuna a gwa pevi, konima sho a tegelele ethimbo ele.’Onda li nda hala oku ninga eishangitho lyo pamupopyothano kokutya ongame kwa li omuntu gwo tango ndi ishangitha moKhorixas ndele ngashingeyi shika onde shi yugwa ,’ osho a ti ngaaka.