Omaidhengomumwe gopapolitika ga holoka ishewe mOnooli

OMULUMENTU gumwe e li oshilyo shopaati yo Rally for Democracy and Progress (RDP), mOsoondaha okwa ningile oshilyo shimwe sho Swapo oshipotha shonkambadhala yedhipago konima sho OmukwaSwapo nguka e mu umbu e te mu ulike wo ondjembo momutse piikolokosha yopapolitika ya li pOnyaanya mOlyomakaya.

Oshinima shika osha landula oshigongi sho RDP sha li pOnkumbula, gu li kuumbangalantu-zilo wOndangwa, mpoka AakwaSwapo ye li 50 lwaampoka (ya li ya kwatelwa komeho ku Kansela Walde Shejavali), ya li ya kambadhala okusitopa iihauto yo RDP kayi ye pomukunda nguka.
Aapolisi opo ya li e taya kaleke ongundu yAakwaSwapo kokule. Oshilyo sho RDP Sam Hamunyela okwa lombwele The Namibian kutya opaati yawo oya li yi na oshigongi shObrancha pOnkumbula mOlyomakaya. Ihe ongundu yAakwaSwapo oya li ya kala ye ya tegelela ookilo ntano okuza momukunda nguka, opo ye ya indike kaa ye mOnkumbula.
Oya li yi ye tu umbu nomalaka kehe na konima yoshigongi shetu,oya lu ye tu tegelela popepi nEenhana, ihe Opolisi opo ya li okukondola ongundu yAakwaSwapo,’ Hamunyela ta lombwele The Namibian ngaaka.
Shejavali oku li Kaansela gwoshikondjohogololo sha Eengodi moshitopolwa sha Hangwena. ‘Manga ta tu ningi oshigongi shetu pomukunda, Kaansela Shejavali okwa piti po nohauto ye yombaki, a tula ko oombendo yi li mokule ta kambadhala okupiyganeka oshigongi shetu,’ Hamunyela ta hokolola.
Mondjila yawo okuya komagumbo, omumwayinamati gwa Sam Hamnunyela, Vilho Hamunyela (a tseyika nawa nedhina Kabila) naakintu yaali (gumwe gwa Sam), oya mono ohauto yi na aakwaSwapo ye li 12 lwaampoka ya lamba yawo, taya umbu omatukano.
Oya li ye tu tidha oshinano shookilo 30 lwaampoka, taye tu ulikile omunwe gwopokati, dhoka dhi li etukano enene,’ Sam Hamunyela ta popi ngaaka. ‘Otwa thikama pOnyaanya (shi li kuuzilo wOndangwa), mpoka mumwamememati Vilho e na obisinisa yedhina Kabila Bar.
Ohauto moka mu na AakwaSwapo oya thikama konima yetu na onda li nda hala okuthaneka ohauto ndjika yi na onomola N 2762 SH. Omulumentu gumwe e na okakepi ko Swapo okwa zi mo e ta ganda ndje, ta ti kutya nandi sitope okuthaneka ohauto ye.
Kanda li natango nda thaneka ethano, sho a hili mo okambindja kandje ko RDP, e ta yakula ndje ooselula ndatu mekutu lyokambindja kandje nokakepi kandje mko RDP komutse gwandje,’ Hamunyela ta hokolola.
Onda li nda hala a galulili ndje okakepi kandje, ihe okwa dhenge ndje nongonyo. Onde mu galulile wo ongonyo e ta gwile pevi, ihe okwa kutha mo ombisitoli e ta umbu mombanda. Konima yaashika, OmukwSwapo okwa tono ndje oonkondo e ta tu gwile pevi atuhe, okwa li a tula ndje kohi.
Okwa lumata ndje momutse. Omukadhona gwandje okwe ya putse. Okwa mu mono u ulika ndje ombisitoli momutse, e ta mu kutha ombisitoli ndjika nokuyi gandja kAakwaSwapo yalwe mboka ya li mohauto.,’ Hamunyeta ta tsikile ko.
Hamunyela okwa ti mumwayina Kabila naakiintu mboka yaali, oya li nee ya yi kOpolisi ya Ndangwa meendelelo ya ka lopote oshinima shika. Okwa lombwele Oshifo shika okuza mOshipangelo sha Nandjokwe kutya oshilalo shoka a ningwa sho na lumatwa momutse, osha pangwa.
OmukwaSwapo nguka, ngoka edhina lye li shiwike kOshifo shika,naye okwa li wo aniwa a hala okuningila Hamunyela oshipotha. Komanda gwOpolisi moshitopolwa sha Shana, Ndahangwapo Kashihakumwa, okwa shi koleke kutya oshinima shika oye shi lopotelwa na onomola yoshipotha shika oyo: (CR 42/02-2009).