Omahogololo gomuwiliki gwoSwapo

ONGUNDUPITITHI yoSwapo moshitopolwa sha Hardap oya ningi omahogololo omape omaandaha oku konga omuulikwa ngoka ta kutha po iilonga yokukwatakanitha iinakugwanithwa yongundu ndjoka moshitopolwa shoka.

Kuyele omahogololo ngoka ga ningilwe moshitopolwa oga li ga hogolola aaulikwa, Karl Kisting, Sophia Jacobs na Hansina Huisemas mboka oyo ya mwene omawi ogendji, nomadhina gawo oga tuminwe kOmbelewa yoSwapo koVenduka oku talwa nawa noku ziminwa koPolitburo. Ndele konima aaulikwa mbaka ina ya ziminwa , opo mokati kaambaka mu ze omuwiliki gwokulipo gwoshitopolwa shoka. Newiliko lyoshitopolwa olya lombwelwa opo li ninge omahogololo omakwawo. Oonzo odha ti oshinima shika osha ningwa molwaashoka aawiliki yamwe yomoshitopolwa oya nwethamo etokolo lyopolitburo oku ekelahi omadhina gaamboka.Onzo yimwe oya ti aantu mbaka oya ningi iihakanwa mekondjelo lyiipundi nenwethemo moshitopolwa sha Hardap.Etompelo kutya omolwashike aaulikwa ya tindwa oondyoka kutya pomahogololo mpoka ka pwa li aawiliki ayehe mboka ye na oshinakugwanithwa shoku kwatela komeho oshitopolwa shoka.Pomahogololo ga hugunina omunashipundi gwaawiliki mboka ye na oshinakugwanithwa noshitopolwa sha Hardap, Jerry Ekandjo, Katrina Hanse Himarwa na Joel Kaapanda opo ya li noku tala nkene ayihe ta yi ende. Opolitburo oya ti ishewe kutya aawiliki yamwe mbaka ya hala oku hogololwa ya ninge aakwatakanithi oye li nale piipundi yuuwiliki mongundu moshitopolwa. Shika osha guma Karl Kisting ngoka eli omukuluntu gwewawa lyaakuluntu moHardap.Momahogololo gOmaandaha, mboka ya mono omawi ogendji oyo Huisemas, Jacobs nOmusita Stefanus Tiboth, nomadhina gaambaka yatatu oga tuminwa kombelewa onene yoSwapo opo ga ka ziminwe.