Omahangano gaaniilonga inaga pewa shoka ga hala

EINDILO lyehangano lyaaniilonga yopashigwana[NUNW] opo omuperesidende a tulepo ongundu yekonakono lyoshinima sha GIPF, olya tindwa.

Oshifo shoThe Namibian osha tseyithilwa kutya oshigongi nomuperesidende Hifikepunye Pohamba inashi tsa kumwe kutya na pa ningwe okommissi yopauperesidende okukonakona iilonga yehangano lyoopenzela dhaaniilonga yepangelo.Unene tuu okutala nkene ewawa lya GIPF ndyoka lyoku gandja omikuli komahahangano[DCP] olya li lya longo ngiini.
Oshigongi oshinene sho NUNW shoka sha li ko omwedhi gwa yi osha li sha thaneke kutya omathaneko ngoka ga gandjwa ku Namfisa kombinga ya GIPF ngaashi kutya ewilikongundu noshowo ewiliko , lya GIPF li tidhwe mo miilonga pakathimbo li ye miilonga .Okongressa oya li woo ya indile kutya iimaliwa yaaniilonga nayi galulwe ko kwaamboka ye yi pelwe ndele oye yi longitha nayi.
Pethimbo lyokongressa NUNW okwa tile kashishi oshinakugwaniuthwa she opo a holeke iinima kohi yemate.Ndele yo oya hala iinima ya hololwa puuyelele. Namfisa mekonakono lye lya GIPF okwa ndhindhilike kutya aawiliki yamwe yomahangano gaaniilonga oya li taya lungu nokwiitapula tashi vulika. Othe Namibian ina yi vula oku kwatathana na Evilastus Kaaronda oshoka ongodhi ye oya li ya dhima.Iilyo yimwe iikuluntu mongundu yo Swapo oya hokololele oThe Namibia kutya ekonakono lyomuule moshinima shika otali ka kwata ethimbo na ota li ka mana po iimaliwa unene tu sho ekonakono lya fa ndika lya li lya ningwa nale ku Namfisa.Omushangwahokololo gwa Namfisa oguli poshitaafula sho muperesidende Hifikepunye Pohamba.Oshigongi shika pamwe nomahangano gaaniilonga osha ningwa konima sho ewilikongundu lya GIPF lya li lya pulwa omapulo ogendji kiilyo yokabinete kombinga ya DCP nomikuli dhilwe. Etokolo ly aPohamba otakutiwa etokolo lyokabinete akehe, kutya ina pa kuthwa onkatu ya shoneka oGIPF.
NUNW okwa li a shangele omuperesidende Pohamba moka ya indile opo a potokonone omukundu gwa GIPF omanga omahogololo ga Novomba inaaga adha.Momumvo 2006 Namfisa okwa li a ti napa ningwe ekonakono lyiithikamena moshinima sha DCP. Ekonakono olya ka mona kutya oshiketha shokugandja omikuli shika sha DCP oshina omapuko ogendji, ndele nee GIPF ina ka galulako iimaliwa yaanapenzela mbika oyindji.Omushangwahokololo ngoka ogwa pewa ombelewa yominista yiimaliwa, Saara Kuugongelwa Amadhila noshowo Omuprima Nahas Angula.Kuugongelwa Amadhila okwa ti okabinete ota ka konakona oshinima shika na otaka ka tseyithila oshigwana kombinga yoshinima shika . Okwa ti nonando okabinete ota ka kundathana oshinima shika, itashi ti kutya Namfisa nenge GIPF ita ya vulu oku katuka oonkatu dhilwe moshinima shika.Kuugongelwa Amadhila okwa uvaneke kutya okabinete ota ka katuka onkatu yi na uuwanawa woshigwana komutima.