Olwoodi letu inali pwa – NEFF

Omupedu pelesidente wongudu yoNamibia Economic Freedom Fighters (NEFF) Kalimbo Iipumbu okwa ti ongudu otai ka pula omhangu yopombada opo i kaleke etokolo lokomisi yomahoololo yaNamibia lokwiikufa mo meengudu dopolitika.

Iipumbu oshinima eshi okwe shi popya konima ongudu yaye ya kanifa oshibofa osho sha li pokati kavo nokomisi yomahoololo komhangu yomahoololo oshivike sha dja ko mEtine.

Ongudu oi na okuninga keshe osho tashi dulika opo yaa lukile mopolitika yaNamibia, osho a ti ngaho.

Okomisi yomahoololo okwa li ya kufa mo oNEFF meengudu dopolitika muJuni. Omhangu okwa li ya ekelashi oshibofa shoNEFF osho kwa li ya tulila mo okomisi yomahoololo konima ya pangula kutya omhangu yomahoololo kai na eenghono dokutokola keindilo lomeendelelo olo kwa li ya tula mo momafiku 05 Juli.

Ongudu yoNEFF, oyo kwa li ya findana oipundi ivali momutumba wopashiwana momahoololo opaliamente momudo 2019, okwa li ya pula omhangu opo i lombwele okomisi yomahoolo iha ye komesho netokolo layo lokwiikufa mo meengudu dopolitika.

Okomisi yomahoololo okwa li ya tokola okukufa mo oNEFF meengudu dopolitika mokati kaJuni shaashi ongudu oya dopa okuyandja omikanda dayo doshimaliwa kokomisi ngaashi tashi pulwa i ninge kokatendo komahoololo.

Meenghundafana noDesert Radio Etine loshivike sha dja ko, Iipumbu okwa ti ongudu yavo paife otai twala okomisi yomahoololo komhangu yopombada yaVenduka. Iipumbu okwa ti kapu na nande efiku ongudu ei i ka teke po.

“Otwa tota po ongudu ei opo tu kalele po ovanailonga novafyoona ndee itatu ka dinika nande kwaavo ve udite kutya otava dulu ashike okuninga oinima paife ndee tava efa. Otu na okukala ovakwaita alushe,” Osho a ti ngaho.

Iipumbu okwa weda po: “Otwa kala hatu longekida ongudu yetu nokutota oitukulwa yomahoololo omomudo 2024. Nande opu na oumbada, ovanyasha, eehepele naavo tava monifwa oixuna ove lilongekida okufikama va pama, ndee tava hoolola ndee tava kwashilipaleke kutya NEFF okwa kalelelwa po moikondo aishe yonghalamwenyo.”

Metokolo lomhangu, omhupanguli Orben Sibeya okwa ti NEFF okwa li ta pula omhangu i yadje elombwelo kokomisi yomahoololo opo iha ye komesho netulomoilonga letokolo layo lokwikufa mo meengudu dopolitika.

Ongudu natango oya pula omhangu i yandje elombwelo li li ngaho omanga ongudu ya twikila neindilo opo etokolo lokomisi yomahoololo li talululwe noli ekelweshi. Omhangu yomahoololo omhangu ye li kalekelwa oyo oilonga yayo ya tumbulwa nawa mokatendo komahoololo komudo 2014, Sibeya osho a ti ngaho.

Okatendo oka ngabeka oilonga yomhangu yomahoololo kombinga yoikumungu yopetameko lomahoololo fiyo okomaindilo a dja kovapanguli voinima ya pamba omahoololo.

Eindilo loNEFF kombinga yetokolo lokomisi yomahoololo lokwiikufa mo meengudu dopolitika kashi shi nande oshikumungu sha pamba omahoololo osho omhangu yomahoololo i na eenghono okutokola, Sibeya osho a tumbula ngaho.

Okwa ti omatokolo aa inaa imba nande ongudu yoNEFF i ye komhangu.

Iipumbu Etine okwa li e likanyuna kutya ongudu yavo inai liufa kokatendo komahoololo ndee ta ti ongudu inai ongela ashike omikanda dayo doshimaliwa moule wefimbo olo la tulwa po.

“Oshikumungu shokulongela kumwe osha tameka meengudu dopolitika adishe okudja momudo 2022 fiyo 2023. Otwa konga omuvaluli ndee hatu yandje omambo etu kehangano lokuninga omavalulo,” Osho a ti ngaho.

Okwa ti ongudu kakwa li tai dulu vali okutya ko sha konima eshi kwa li ya yandja omambo ayo kehangano lokuninga omavalulo.

“Ovavaluli ove na okutalulula nawa keshe epeni olo la longifwa omanga inava tya ko sha, kutya nee ove na owino ile kave na sha, ito dulu okuvafininika vaame kombinga yoye, nande nee owa futile omavalulo,” Iipumbu osho a ti ngaho. Okwa ti ongudu okwa li yuudite kutya otai liufa kefiku laxuuninwa lo30 Juni olo kwa li la tulwa po lokwoongela omikanda doshimaliwa kokomisi yomahoololo.

Momukanda oo wa twalwa komhangu haende oo e lile po ongudu yoNEFF okwa ti ekufemo longudu meengudu dopolitika ola nyika oshiponga noinali udika nale.

Natango ova ti vali etokolo lokomisi yomahoololo ola ningwa unene diva, noNEFF inai i pewa omhito opo i yandje ehokololo layo omanga etokolo inali kufwa netokolo kali li mondjila.

Okatendo komahoololo otaka pula opo eengudu dopolitika di yandje omikanda doshimaliwa kokomisi yomahoololo keshe odula, Gerson Narib oo a kalela po okomisi yomahoololo osho a ti ngaho.

Okomisi yomahoololo okwa li ya londwela ongudu momukanda womafiku 25 Apilili neudo kutya ngee inai ongela omikanda dayo doshimaliwa moule womafiku 14 okomisi otai ka longifa okatukulwa kokatendo komahoololo oko ka yandja oufemba opo ongudu i kufwe mo meengudu dopolitika, Narib osho a ti ngaho.