Olusheno okuza moonkondo dholute

NAMIBIA oye gumwe gwiilongo iheyali mbyoka ta yi dhiladhila okutunga itaasi yokulonga olusheno talu zi miikwalute.Iilongo mbika ota yi dhiladhila shika opo yi vule okukandula po eshongo lyompumbwe yolusheno ndoka halu zi moonzo itaadhi luudhike nokuyona onkalo yombepo yuuyuni. Ngashingeyi omikalo odhindji dhokulonga olusheno muuyuni ohadhi nyateke ombepo yuuyuni naashika osha eta elunduluko monkalo yombepo yuuyuni.

Iilongo iikwawo mbyoka tayi tala koonkondo dholute ongo onzo yolusheno oyo Algeria, Egypt, Kenya, Libya,Niger, na South Africa.Uuyelele mbuka owa nyolwa mowebsite yehangano limwe lyokoAmerika ha li ithanwa Electricity Forum, no wa holokele moka pehulilo lya Desemba omumvo gwayi.Ehala ndika olya li lya ti ominista yopevi yoomina niikwankondo Bernard Esau okwa tile, Namibia okwa tokola oku tunga oshitaasi sholusheno shoonkondo dholute, okugandja olusheno ku Namibia noshowo okulu landitha muumbugantu wAfrika ta shi pitile mehangano lyomahangano gomalusheno hali ithanwa, Southern African Power Pool[SAPP].Esau okwa li ishewe a ti oshilongo otashi kundathana na Areva, ndele otashi ka gandja otendela opo shi hogolole ehangano ndyoka ta li pewa iilonga yokutunga oshitaasi sholusheno lwolute shaNamibia.Pahapu dhehangano, World Nuclear Association, epangelo lya Namibia olyi itulamo momulandu gwokulonga olusheno lwalyo lyene okuza moonkondo dholute lwo pomumvo 2018Omuperesidende Hifikepunje Pohamba okwa kolekele euvathano na India pamwe nomuleli gwoshilongo shoka omuprima, Manmohan Singh opo ya tunge itaasi yolute, noshowo oku dheula aaniilonga piitaasi mbyoka. Eshaino lye uvathano olya li lya kolekwa muSeptemba 2009 pethimbo lyetalelopo lyomuperesidende, Pohamba koIndia.Pethimbo ndyoka owebsite ya Bloomberg oya li ya nyola kutya, oshikundaneki sha India , the Press Trust of India osha tile India na Namibia oya shaina euvathano lyokulongitha oonkondo dholute pambili noshowo okulanditha ouraana nokutunga oshitaasi shookondo dholute.Oshikundaneki the International Business Times nasho osha li woo sha nyola kombinga ye uvathano ndika pokati ka India na Namibia nelalakano lyombili lyokulongitha oonkondo dholute.Okabinete ka Namibia oka tokolele mu Juni 2008 kutya Uuministeli woomina noonkondo nawu etepo omulandu gwokuwilika iikwalute, noshowo okulandula ondjila yelongitho lyiikwalute nomukalo gwokweeta uuwanawa kaaNamibia tashi zi mo uraana ndjoka hayi fulwa moshilongo muka.Pethimbo ndiyaka Namibia okwa ti shika otashi ka kwathela moku etapo olusheno oshoka opu na ompumbwe yolusheno moshilongo, na oshikwawo otashi eta omukalo okugwedha ko kongushu yo uraana ndjoka hayi fulwa moshilongo muka momwaalu ogundji.”Namibia oshilongo shina ouraana oyindi na otashi ka mona uuwanawa owindji ngele oonzo ndhika odha longithwa mokuyambapalekwa omanga inaa dhi tuminwa pondje kaalongithi yiilongi yilwe.’ osho okabinete ka tile ethimbo ndiyaka.Omulandu gwewiliko lyiikwalute otagu utha nokulonga niinakugwanithwa yi na sha nokugandja oombapila, okutunga, okutula miilonga, okulongitha noshowo okupata itaasi ayihe niilongitho ayihe yina sha nelongo lyoonkondo dholute.Ompango ndjoka ya thanekwa ta yi totwapo melongelokumwe nehangano lyiikwalute muuyuni[International Atomic Energy Agency], otayi kala woo ya tala kombinga ya nkene ikwalute tayi endithwa noshowo ta yi pungulwa, unene tuu iiyekelwa hi yolute.