Olufuko otalu pula komeho moNooli

OLUFUKO onkee talu pula komeho moNooli, naakadhona aagundjuka lela otaya fukala pamuthigululwakalo momikunda dhomuumbangalantu wa Namibia, unene tuu moshitopolwa shoka sha kala hashi ithanwa Owambo kwali.

Oshiwike ashihe shoka sha zi ko osha li oshiwike sholufuko momukunda Ohakweela noshowo momukunda Ondjete mOmbalantu moshikandjohogololo sha Kalongo moshitopolwa sha Musati, moka oThe Namibian, ya adha aakadhona aagundjuka lela ye li metifa lwokufukala, ye ya adha mooMathias Shilinge omanga momukunda Ondjete lwa li mooMaria Andjaba.Moomeme Maria Andjaba omwa fukalela aakadhona ye li yaheyali (7) omanga moo Shilinge mwa fukalela aakadhona ye li yatano lwaampoka. Tate Shilinge na gumwe gwomaafukiki, ano meme Rachel Ndapwilwa ngoka e li Omukulukadhi gwElenga enene lya Mbalantu, tatekulu Oswin Mukulu, oya lombwele The Namibian pootate Shilinge mpoka kutya aakalimo yokomikunda dhawo ndhoka, oye li pamuthigululwakalo gwoShimbandja nomalufuko otaga ningwa naanaa pamukalo gwopaShimbandja. Ano haga kwata omasiku gatano. Tashi ti ngashi ngashi ngoka ga li ko oshiwike sha za ko, oga tamekele Omaandaha noga hulu nee mEtitano, moka aakadhona mbaka ya hokololwa nee konakuyafukaleka kutya ya fukala naya shune nee komagumbo nokukala mondjila nomomalandulathano moka ya lombwelwa ya kale. Olufuko mOmbalantu, nonande omo lwa kala shito, olwa tukuluthwa kwali kOmaulikilo gIikwaipindi gAutapi ngoka ga li ko pokati komumvo nguka, ngoka ga li ga kwatela mo etulomiilongo lwOlufuko. Oyendji oya za po taya ti kutya etulomiilonga lwolufuko nduka, osho sha li etameko lyokupendula po eningo lyomalufuko, unene tuu mOmbalantu. Ashike nee tate Shilinge na meme Rachel otaya lombwele The Namibian kutya shoka hasho, Olufuko omo ashiuke lwa kala mOmbalantu, unene komikunda ndhoka dha pamba kombinga yaMbandja hoka. The Namibian mokuninga wo naye omapekaapeko, okwe shi mona mo kutya aanona oyendji ye li mOosikola, ngashi kOoseko nokiiputudhilo yopombanda ya Namibia nenge ya za monamibia noye li kwaambyoka yopondje yoshilongo, nani oya fukala nale pamukalo nguka gwopamuthigululwakalo. Yamwe haya ti kutya oya fukala pashipagani nenge paengoma. ‘Tse kombinga yetu huka otwa kala ashike tatu fukaleke aanona yetu noyendji oya fukala pamuthigululwakalo ngeyi yo wo mboka ya hala ohaya ka ninga ashike oohango dhawo ishewe dhOpashikeresiti nokuya komeho nonkalamwenyo yawo yi li nawa,’ me Rachel ta ti ngawo sho wo tashi kolekwa ku tate Shilinge.Shi na sha nee nolufuko lwolwene mootate Shilinge moka, The Namibian okwa lombwelwa kutya olwa tamekele Omaandaha goshiwike sha zi ko lwo talu hulu mEtitano lyoshiwike tuu shoka sha zi ko. Esiku lyotango okwa tamekiwa nee naashoka hashi ithanwa ‘Ekoho’, moka oonakufukala taya thiki na omo wo tamu mewa omasiga gokuteleka nokuya miingombele kwoonakuvala oonakufukala. Otakulandula shoka hashi ithanwa ‘Omakunde’ moka oohe yaafuko taya tomo. Taku landula shoka hashi ithanwa ‘Okambandjona’ moka ooyina yaafuko nayo wo taya tomo. Ashike manga ayihe mbika iyali inayi ningwa oonakufukala ohaya falwa koshigunda ya ka tale oongombe ndhoka taya tomenwa. Opo ya kale ye na uushili kutya otaya tomenwa oongombe. Otaku landula nee shoka haku tiwa ‘ Efundula’ moka nee tamu liwa oondja dhodhituthi sholufuko. Aafuko haya yi nee kehala tali ithanwa ‘Etambo’, hoka oonakufukala taya pe ooyene yawo (oombwishiki), ano oonakuyakuthapo iikulya yalye nawa nokutyapula oshituthi sholufuko. Aafuko mboka haye ya molufuko ye na nale aayaleki yawo, nayo ohaye ya pe ya lye pamwe naamboka ya yalekela molufuko. Aafuko yoyene kaya lila pEtambo mpoka. Ohaya pe ashike ooyene yawo iikulya yalye. Yo otaya ka lila kelugo (kepata). Miituthi mbika ohamu liwa lela nawa, oshoka omufuko kehe oku na okudhipagelwa oongombe mbali. Yimwe okuhe, omanga yimwe ku yina, ano okuza koombinga ndhoka mbali. Ngoka wo gwomezimo, koombinga mbali, a hala oku mu tselela, ota vulu oku shi ninga.Ohaku landula nee shoka hashi ithanwa ‘Ondjibulula’ moka aafuko taya lalekwa ya shune komagumbo gawo, yo mboka yomegumbo, ngele opu na, taya kala mo.