Olufuko inalu uvikako nawa

ELONGEKIDHO oku yumudhapo olufuko nenge ohango yopamuthigululwakalo moshitopolwa shaMusati osha fa inaashi uvikako nawa koyendji.

Nomolwa euveko lyopombambo oshinima shika osha talikako momwiityo gwa puka. Shika osha holoka puuyelele konima sho aa unganeki yoshidhano shika nenge oshiithanene shika ya pewa uusama nokusimononwa monkambadhala yawo oku yumudhapo omukalo ngoka aakadhona kwali ha ya longekidhilwa okuya mondjokana pahedhi dhoshi Africa. Aalongekidhio yoshiithanene sha thanekelwa omasiku 21sigo 27 Auguste 2012 oya ti inaya uvikako nawa nenge oya uvikako pombambo. Oya ti oshiithanene shoka otashi kala hashi ithanwa Olufuko, edhina ekulu lyomukalo gwAawambo okupititha etanda aanona yaakadhona, ndele shoka tashi ka ningwa omasiku ngoka osho omauliko giipindi noshowo gwomuthigululwakalo. Pethimbo ndyoka aakuthimbinga otaya kuulika nokulanditha iilongomwa yopahedhi noshowo iikulya. Gumwe gwoomaalongekidhi yoshiithanene shika, gavena gwOmusati, Sophia Shaningwa okwa ti olufuko olwo oshiningwanima shimwe shaambyoka yi li momusholondondo gwiiyetwapo omasiku ngoka, mokuulika onkalamwenyo yopahedhi noshowo okudhana pashinyandwa. Okwa fatulula kutya otapa ka ulikwa nkene olufuko lwali halu ningwa molela monakuziwa, okuulikila aantu mboka inaa ye lu mona nale, nenge inaa ya kutha ombinga mulwo. Shaningwa okwa ti olufuko italu ningwa lela, ngaashi monakuziwa, moka aakadhona ya li ya longekidhilwa ondjokana noshowo oku ninga aanamagumbo taye ga tonatele noku ga sila oshimpwiyu.Okwa ti ngiika edhina ndika olufuko olyo lyeeta epiyagano, naashika osho sha eta opo oyendji ya gandje uusama noshowo yuulike omalimbililo kombinga yeyumudhepo lyomukalo ngoka.Okwa kundanekelwe kuyele kutya ongelki onkwa Evangeli pa Lutheri moNamibia[ELCIN] oya li ya lombwele iilyo yayo opo yaa kuthe ombinga moshinima shoka, oshoka itashi tsu kumwe noohedhi dhopakriste. Mombapila yopausita ELCIN okwa pangula oshinima shoka nokwa ti okwe shi tala ongo omukalo moka aagundjuka taya kumikwa yii iyethele moluhondelo, ndoka ta lu ya etele omavu gohoni.Shaningwa okwa ti pethimbo lyoshiithanene shika omikalo dhopahedhi ota dhi ka ulikwa, iilongomwa yuunamapya otayi ka ulikwa noku landithwa woo.Okwa ti ita pa ka ningwa olufuko ndoka andola aalumentu taya ka kutha aakiintu opo ya ninge aaholike yawo, ndele otapa ulikwa ashike nkene oshinima shoka sha li hashi ningwa.Ehangano lyuuthemba, NamRights nalyo olya li lya pangula oshinima shika lya ti osha nika okatongo niishewe otashi shundula aanona yaakadhona.Omuwiliki gwa NamRights, Phil ya Nangolo okwa pula Ombudsman opo a konakone omukalo nguka, okwa shangele woo komuperesidende, Hifikepunye Pohamba emu pula opo a yemo moshinima shika pamautho gekotampango oku soshimpwiyu kutya aanona yaakadhona yomimvo dhili kohi yomu 18 ina, ya kuthombinga moshinima shika. Nangolo okwa li woo a kumike aanangeshefa opo yaa yambidhidhe oshinima shoka.