… okwa ti omadina amwe omapandaanda aale unene
Omushiiviveta Omunamibia oo a dile koGerman, Andreas Vaatz, okwa sheka elelo lodoolopa yaVendu eshi tali kendabala okudima po ondjokonona yaGerman nokuyandja omadina ape komapandaanda oo kwa li a lukwa pefimbo loukoloni.
Oshilando osha tameka okuluka nokulukulula omapandaanda e li 17 mOvenduka Etine loshivike sha dja ko.
Vaatz okwa ti oshinima eshi inashi pumbiwa.
Okwa ti omanga moshiwana mu na ovanhu va yooloka ngaashi, Ovagerman, Ovatilyane, Ovanama nOvawambo, Ovaeuropa ova tongolwa mo.
“Paife ngaha ovaeuropa inava tali ka ko nandenande. Omadina aeshe aGerman omakufwa po ndee osho otashi ulike okatongotongo kovakwashiwana vaGerman, osho tashi etele Ovenduka i kale ngaho neenghono,” Vaatz osho a lombwela oDesert Radio ngaho Omaandaxa.
Okwa ti okulukulula omapandaanda otaku eta engwangwano shaashi ouhalita vomapandaanda itava tu vali kumwe nomadina ape.
“Molwetoneno olo kashi shi shiwa okulundulula omadina omapandaanda. Kashi li pauyuki kovakwashiwana ovo ve na okulihonga omadina ape omapandaanda,” Vaatz osho a ti ngaho.
Okwa ti elelo lodoolopa nali tale kokuyandja omadina komapandaanda ape ponhele yokulundulula omadina omapandaanda oo e li po nale.
Okwa ti ovanhu nava tule po nee nande oihongwafano opo kudule kudimbulukiwe oinima ya fimana, yondjokonona ile ngaa yoinima imwe i lili, ponhele ve va lukile omapandaanda. Vaatz okwa kelela ekufepo noshihongwafano shaCurt von Francois nokulukulula epandaanda Bismarck mOvenduka li ninge Simeon Shixungileni. Okwa ti omadina ngaashi olo oli le unene nokuninga edina lepandaanda.
“Itashi vatele sha okukala u na edina lile ngaho,” Vaatz osho a ti ngaho.
Omukulunhuwiliki welelo lodoolopa yaVenduka Moses Matyayi okwa ti oshinima eshi shokulukulula omadina ohashi ningwa she likolelela koveta yomalelo eedoolopa.
Ovakwashiwana ohava shiivifilwa oshinima eshi okupitila moikundaneki, osho a ti ngaho.
“Efimano loshiima eshi itali pitwa pomunghulo. Oshiwana shokomongula otashi ka shiva kutya omunhu okwa ninga shike mondjokonona yoshilongo,” Matyayi osho a ti ngaho.
Okwa denga omufindo kombinga yomalunduluko, ta ti ondjokonona yaNamibia oya dingonokwa unene komawii oo a ningwa kovakolonyeki.
“Ito dulu okwaanya kutya oinima imwe oya pumbwa okulunduluka opo tu endele pamwe noinima oyo tai ningwa paife.
Eshi otashi ningwa shaashi omadina amwe okwa li omadina ovanhu ovo va ningila omihoko dimwe omahepeko,”
Matyayi osho a ti ngaho. “Opu na oinima ihapu ya pumbwa okutalika opo kumonike ngee omadina oo otaa ka kala ngaa a pumbiwa momafiku nomafimbo amwe. Mutu okwa li shi li mondjila pefimbo opo, omunhu ota dulu okukala ependafulu pefimbo opo, ashike osho inashi pumbiwa vali nena,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
