Okomitiye yEgumbo lyoPashigwana inayi nyanyukilwa onkalo yondholongo yopolisi

Okomitiye yegumbo lyopashigwana miipambele yopondje, etanga lyegameno nepopilo lyoshigwana, oya popi kutya inayi mbilipalelwa konkalo yondholongo yopolisi yaMbaye, konima sho ya talele po ondholongo ndjoka, oshiwike sha zi ko.

Osheendo shokomitiye okwa li she endithwa mondholongo ndjoka okutala onkalo yondholongo nokwa konekiwa kutya omatungo oga kulupa ishewe kage li monkalo yi li nawa okukaliwa kaanandholongo osho wo kaapolisi mboka haya longele mo.

Komanda gwoshitaasi shopolisi yaMbaye, Patrick Muhita oye kwa li a kwatele komeho oku ulukila osheendo ondholongo yawo, nokwa ndhindhilikwa kutya etungo lyondholongo ndjoka otali pumbwa lela okwoopalekwa, niihauto oyindji oya teka.

Okwa ndhindhilikwa wo kutya mekulo lyondholongo ndjoka kamu na ombepo ya gwana ishewe omu na ompumbwe yiikulya nomakumbatha.

Ehala lyaapolisi mondholongo moka otaku hokololwa li na uundjugo wa teka.

Muhita okwa koleke kutya omupepo gwomekulo ogwa teka ishewe omathimbo gamwe ohaya kala niikulya inaayi gwana.

“Uuna kaapu na omboloto, ohatu kambadhala tu tume uusila kendiki lyondholongo yezulonkalo opo ye tu ningile oomboloto. Omathimbo gamwe otse yene hatu landa iipumbiwa yilwe yiikulya ngaashi oosopa,” osho Muhita a popi ngaaka.

Muhita okwa popi kutya ohaasa ihayi kala ya gwana okutelekela moombiga dhawo oonene ndatu ndhoka hadhi pula ohaasa oyindji.

“Otashi kala hwepo tu pewe omasiga gokolusheno,” osho a popi ngaaka nokwa gwedha po kutya omathimbo gamwe ohaya ka telekela kendiki lyondholongo yezulonkalo.

“Uupyakadhi uukwawo twa taalela owompumbwe yiiopalekithi,” osho a popi ngaaka.

Okwa popi kutya oye na elago molwashoka omathimbo gamwe ohaya pewa omakwatho kaanangeshefa yomomudhingoloko, nokwa popi kutya ihaya pewa iipumbiwa ya gwana okuza kepangelo.

“Okwa li twa pewa omakumbatha ge li 10 omasiku ga zi ko, ashike aanandholongo nayo oye li uupyakadhi molwashoka omakumbatha ngoka ohaye ga kutha oongodhi naashoka ohashi dhigupaleke onkalo. Ohatu kambadhala okuya pa omakumbatha ashike ohaye ga yonagula po nolwanima ohaye tu galukile taya popi kutya oye li mompumbwe yomakumbatha.”

Muhita okwa popi kutya oye li mompumbwe onene yesiloshimpwiyu lyaanandholongo mboka ye na uunkundi wopamadhiladhilo, molwashoka oye na okufalwa kOvenduka ashike ohashi pula ethimbo ele opo ya tumwe naashoka ohashi eta ya kale mondholongo mumwe nooyakwawo.

Okwa popi kutya uupangelo waanuunkundi wopamadhiladhilo owa pumbwa okwaandjaganekwa niitopolwa moshilongo, nenge pu tulwe omulandu gwa nuka po gwokufala aantu mboka meendelelo koshipangelo uuna tashi pumbiwa.

Gabriel Matilile, omuteleki mondholongo ndjoka yopolisi, okwa koleke kutya ohaya kala shili mompumbwe onene yiikulya.

“Omathimbo gamwe ohatu kutha oshimaliwa moondjato dhetu tu lande oosopa nenge omongwa. Omathimbo gamwe ohatu pewa uusila wepungu ashike kapu na sha osopa. Oomboloto ohatu pewa oonshona, nonkalo ohayi tu thiminike tu shonopeke egandjo lyiikulya. Ookomanda otaya mono lela iihuna, molwashoka oye na ohenda, ohaya kambadhala okulanda iinima yimwe yoyene. Omasiga gamwe ihaga longo. Omathimbo gamwe ohatu ka hehela ohaasa palwe. Nothewa yokuyoga ohatu zi nayo komagumbo.”

Ngoka oye gumwe gwomosheendo shokomitiye yegumbo lyopashigwana, Tobie Aupindi okwa popi kutya onkalo yondholongo yopolisi ndjoka otayi uvitha nayi shili.

“Onda simaneka aapolisi mboka oyo haye tu gamene noku tu pa omayakulo. Okutala kwaashoka nda mono, ita mu vulu okugwanitha po iilonga yeni. Tala owala kiihauto yeni sho yi li. Iilongitho yeni oya kulupa noonkondo. Taleni owala ondholongo sho tayi monika,” osho a popi ngaaka.

Aupindi okwi indile opo omashongo ga taalela opolisi ga yapukilwe, mwa kwatelwa wo olutu ndoka lu na oshinakugwanithwa shokulala iipumbiwa yepangelo.

Nando ongaaka, Aupindi okwa pupula kombunda aapolisi omolwiilongapondoli mbyoka ye eta po nonande otaye shi ningi ya taalelwa komashongo ogendji, nokwa popi kutya otaya ka kundathana opo omashongo ya taalela ga mone ekandulopo.