Okomitiye yefundja ya fudha po

OKOMITIYE ndjoka ya kala tayi ungaunga nefundja mOshitopolwasha Shana mewiliko lyOmunashiopundi gwawo John Kandombo ngoka e li Omunambelewa Omukuluntupitithi mOshitopolwa sha Shana nomUunganeki gwIikwafundja mOshitopolwa sha Shana meme Albertina Aipinge, mEtitano lyoshiwike sha zi ko, oya pata manga iilonga yawo molwashoka efundja lya ya manga.

Epato lyIilonga mbika yOkomitiye yEfundja oya patwa nee pambelewa ku Gavena yOshitopolwa sha Shana, omusamane Klemens Kashuupulwa mEtitano moka pethimbo lyoshituthi shepato lyiilonga mbika sha li sha longekidhwa kOmbelewa ye, ano ya Gavena Kashuupulwa.Moshipopiwa she shi na sha nEpato lyIilonga yOkomitiye yEfundja ndjika, Gavena Kashuupulwa okwa pandula noonkondo Elelo lye lyOshitopolwa sha Shana noshowo Omalelo gOondoolopa dhomOshana ngashi Oshakati, Ongwediva nOndangwa noshowo nee ayehe ya kuthile ombinga meungaungo nEfundja mOshitopolwa sha Shana.Kashuupulwa ta pandula wo unene Opolisi ya Namibia mewiliko lya Komanda gwawo mOshana Komufla Ndahangwapo Kashihakumwa, unene tuu mokukaleka ayehe ya li ya gumwa kefundja megameno nomepopilo li li nawa okuzilila kOpolisi ya Namibia. Gavena Kashuupulwa ta pandula wo Etanga lyEgameno lya Namibia sho nalyo lya kwathela noonkondo nedhagadhaga nosho tuu okututa aakwashigwana ya li ya hepekwa komeya gefundja nosho tuu. Omuleli gwa Shana okwa pandula wo Uuministeli wElongo, wUuhaku, wUukashikekookantu, Iilyo yOkomitiye ndjoka ya kala tayi ungaunga niikwafundja mOshana sho ya kala nokuunganeka iilonga yekwathelo mefundja moka, Ehangano lyOmushigakano Omutiligane, Aanangeshefa mboka ya kala nokugandja omakwathelo koshigwana sha monithwa kwali iihuna komeya gefundja, Okomitiye Onene yOkuunganeka mIikwafundja (FEMCO) sho ya kala tayi shi enditha nawa meunganeko lyayo lyaayihe ya pamba efundja moNooli onene ya Namibia noshowo nee Okomitiye yEunganeko lyEfundja mOshitopolwa sha Shana sho nayo ya kala itayi kotha mokukwathela nokuyakula oonakuhepekwa komeya gefundja. Omuleli gwa Shana Kashuupulwa ta pandula wo noonkondo Iikundaneki ngashi NBC, New Era , The Namibian, Republikein, Sun, Windhoek Observer, Omulunga Radio nIikundaneki wo yilwe yOoradio noyIifo sho ya kala nokugandja omauyelele ogendji lela ge na sha nefundja noonakuhepekwa kulyo.Kashupulwa ina dhimbwa ko wo Ookaansela dhe dhIikandjohogololo nodhOondoolopa sho nadho dha kala tadhi longo nuudhiginini. Tadhi popi oshiponga shefundja mOradio yo NBC moka oongula oonene nosho tuu. Ta pandula wo Omunambelewa Omukuluntupitithi gwOshitopolwa sha Shana tate John Kandombo ngoka a kala ta wilike nawa Okomitiye ndjoka ya kala tayi ungaunga nEfundja mOshitopolwa sha Shana.Poshituthi osho tuu shika, okwa li pwa gandja oonzapo/omapapa gepandulo kwaayehe ya kwathelele meungaungo lyefundja ndika lyonuumvo.