Okomisi yomahoololo yaNamibia oya ti omapopyo oo a ningwa kongudu yomilameno kutya inai pitika ovanadolongo ve lishangife omahoololo keeshi oshili.
Omukulunhuwiliki womahoololo wokomisi yomahoololo Peter Shaama okwa lombwela oikundaneki Etivali kutya omapopyo keeshi oshili notaa pukifa.
“Okomisi oya kundafana newiliko leedolongo ndee tai pitike okutwala eenhele dokulishangifa keedolongo mwa kwatelwa eeshela dopolifi moshilongo ashishe,” Shaama osho a ti ngaho.
Omaandaxa ongudu yoLandless People’s Movement (LPM) oya lundila okomisi kutya oya tongola mo Ovanamibia ovo tava tamanekwa mokulishangifa opo va dule okukakufa ombinga momahoololo opashiwana.
“Oshinima eshi shihe li pauyuki nosha ningilwa owina shokutongola mo ovanadolongo otashi nyeke Ovanamibia oufemba wavo vopaudemokoli notashi va tongola mo moshiwana,” LPM osho ya lombwela oikundaneki ngaho.
LPM oya ti keshe omunhu a hanga okuhoolola na mone omhito yokukufa ombinga moufemba wavo wopaudemokoli.
Oshivike sha dja ko, ovanadolongo vamwe okwa li va lombwela oThe Namibian kutya ove udite inava kwatelwa mo momalishangifo omahoololo.
Shaama okwa ti eedolongo dihapu okwa li nale da talelwa po opo ovanadolongo ve lishangife, omanga dimwe opo natango tadi ka talelwa po ngaashi sha longekidwa.
Shaama okwa ti Ovanamibia aveshe ovo va hanga okuhoolola ova pewa omhito.
Omupedu komufa weedolongo devyulonghalo John Kambimbi okwa lombwela oThe Namibian Etivali kutya peenhele davo opu na omalishangifo..
“Eshi kashi shi oshinima shipe, ECN alushe oha kala e na omalishangifo e li peenhele detu opo novanambelewa have lishangifa,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
