Okawe ka Namibia okatimulongo muuyuni

NAMIBIA okuli mongundu yiilongo omulongo yotango muuyuni kombinga yokulonga okawe komwaalu gwiimaliwa oyindji pamiyalu dhelanditho lyokawe omumvo gwayi.

Pamiyalu dha gandjwa kolutu lwedhina Kimberly Process oshilongo osha mina okawe kongushu yoshimaliwa shoodola oobiliona ntano dha Namibia nenge oodola dhAmerica oomiliona 744 omumvo gwayi. Pahokololo lya nyolwa mehala lyoInternet lyedhina Rapaport, Botswana oye oshilongo shili pombanda mokulonga okawe kiimaliwa oyindji muuyuni omumvo gwayi sho sha landitha okawe kongushu yoodola oobiliona mbali oshinkwanu 59 dhAmerica okuza muuwe wondjundo yookarata oomiliona 22. Russia oye a longo okawe okendji mondjundo hoka ka yelekwa kuudhigu akehe kumwe wookalata oomiliona 34,86 kagu iimaliwa yoodola oobiliona dhAmerica 2,38. Omanga momumvo omayovi 2009, Russia oye a li a longo okawe kondjundo oyindji noshowo kiimaliwa oyindji omumvo ngoka. Canada oye oshilongo oshitatu kombinga yongushu yokawe hoka kalongwa moshilongo shoka omumvo gwayi koobiliona dhoodola dhAmerica 2,30, a landulwa ku South Africa nokawe kongushu yoodola dhAmerica obiliona 1,8. Iilongo yilwe yili meni lyomulongo mbyoka ya landitha okawe kongushu oya kwatelamo Angola alanditha okawe koodola dhaAmerica oomiliona 976,3, Zimbabwe a landitha okawe koodola dhaAmerica oomiliona 339,8 na Australia a landitha okawe koodola dhaAmerica oomiliona 251,7.