Okampani ya Namdeb ota ka laleka miilonga aaniilonga ye li omathele gahameno

OKAMPANI ya Namdeb otayi ilongekidha okulaleka mo miilonga aaniilonga ye li 600 okupitila momulandu gwawo gwokugandja uupakete aaniilonga pwakwiiyamba.

Ngele aaniilonga mu Namdeb oya eindilo ndika, Okampani otayi ka thiminikwa yi ya kuthe mo lela miilonga koonkondo. Pamushangwa, Menindjela gwIikwapondje ya Namdeb Hilifa Mbako, okwa ti nonande Namdeb pethimbo ndika oku li muudhigu uunene ine u mona nale mondjokonona ye,(wondando yakawe ya gwa) ekuthomiilonga lyaaniilonga ye yamwe ina tamekwa natango. Omugandjimulombo gwa Namdeb Ndeshi Hangula-Shikwambi okwa ti omwaalu gwaantu mboka kwa thankewa taya ka pewa uupaketa wawo pamulandu nguka, oye li po 600. Mu Desemba gwomvumo gwa zi ko, Namdeb okwa li a ningi eindilo ya thige po iilonga kuyo yene, molwashoka ondando yokawe oya ya pevi na Okampani ihayi ningi we oshimaliwa shi li nawa. Egandjo lyuupakete ndika olya eguluka sigo omasiku 16 ga Febuluali. ‘Itashi shiwa okutengeneka kutya aaniilonga yangapi ya ninga omaindilo okupewa uupakete sigo esiku lya hugunina,’ Mbako ta popi ngaaka. Okwa ti aaniilonga yamwe otaya ka falwa wo kiikondo yilwe omanga yamwe taya ka penzelwa kuyele. Namdeb oku na aaniilonga ye li 2 200 lwaampoka na aaniilonga 600 otaya ka shunitha omwaalu nguka pevi noopelesenda 27. Hangula-Shikwambi okwa ti nonande Namdeb okwa hala aaniilonga ya kuthe uupakete wawo, itaya vulu okweetha aaniilonga ayehe ya ye molwashoka aniwa opu na iilonga yimwe iinene, mbyoka yi na okukalapo. Mbaka okwa ti eshunithopevi lyomwaalu gwaaniilonga yawo osha etwa kelongo lyokawe lya ya pevi, shoka sha etwa kondando yako ya ya pevi muuyuni. ‘Otu na okweendela pamwe nonkolo muuyuni molwashoka okawe ketu ohaka landitha pondje ya Namibia. Ngele otwa tsikila nokulonga okawa ngashi sha kala, ota tu ka kana molwashoka ota tu ka kala tu na ondumba yako, ndjoka ita tu ka vula okuyi landitha po omolu ondano ya shuna pevi,’ Hangula-Shikwambi ta popi.