Okamatyona ka si sho ka li onyama

OKAMATYONA komimvo ne mOshipumbushomugongo mOshana oka si sho ka li aniwa onyama yondoongi yiisila, omanga aantu yalwe yahetatu ya pangwa moshipangelo shEpangelo sha Shakati omolu okweehama momala sho nayo wo aniwa ya li onyama ndjoka.

Omupopiliko gwOpolisi mOshana, Shisaande Thomas Aiyambo ngoka a koleke oshiningwanima kOshifo shika omaandaha, okwa ti kutya okamatyona hoka ka sa oko Matheus Amwaama[4] komOshipumbushomugongo mOshana.Shisaande Aiyambo ta ti, aakwashigwana mboka, mEtitano lyoshiwike sha zi ko, oya lya aniwa ondoongi yiisila momukunda gwawo. Ta ti osha fa aniwa yamwe yopuukefe hawu ithanwa Okamusheshe oyo yootha onyama ndjoka noku yi landitha kuyakwawo. Okamatyona hoka ka si nako oka li onyama ndjoka ya yothwa nenge ya kangwa mpoka. Ota ti sho kiiyuvu mela nokukunga, onkembadhala yoku ka fala koshipangelo inayi kwatha sha, oka hulithile ashike komukunda hoka nziya manga kwa li ngeno ka falwe koshipangelo.Shisaande Aiyambo okwa indile oshigwana koNooli, shaa lye we iinamwenyo yi isila. Kutya nee oondongi, oongombe, iikombo, oonzi, iingulu nosho tuu, oshoka oshinamwenyo shi isila, onyama yasho oyi li oshiponga oshinene komuntu. Tayi vulu oku kweehameka nenge oku ku dhipaga wo nokuli, ngashi naanaa sha ningilwa okamatyona hoka. Shisaande Aiyambo ota ti kutya, otashi vulika pu na natango aakwashigwana yamwe yokomukunda hoka nayo ya lya onyama ndjoka na inaya ya natango koshipangelo. Ta ti kehe ngoka a lya onyama ndjoka noku uvite mela, na kale a ya koshipangelo a ka pangwe meendelelo ngashi tashi vulika. Ta ti unene tuu uunona, oshoka wo kau na omandjandja ga kola ngashi ngoka gaakuluntu.Oshigwana shomoNooli yopokati, kasha li naanaa hashi li oondoongi, ashike komathimbo ngaka gonyama yongombe ya pumba noyi na ondilo, osha tameka okulya onyama shaandjoka mwakwatelwa, no yondoongi.