Okamati Peter Mutumbulwa ka sa omeya pOmusimboti

OKAMATYONA komunangeshefa a tseyika nawa gwomOngwediva tate Peter Mutumbulwa, kedhina Peter Mutumbulwa okamana oondjenda ombaadhilila sho ka si omeya metale lyokomukunda gwawo kOmusimboti mUukwambi mOshitopolwa sha Shana, sha ningwa omutenya gwEtine lyoshiwike sha zi ko.

Ehokololo pauhupi lya pewa Oshifo shika otali ti kutya nakusa Peter okwa adhika a yi kefudho lyOkrisimesa nomuvo omupe kegumbo lyawo lyomiti kOmusimboti. Omutenya gwEtine nee ndyoka lya zi ko nakusa Peter nayakwawo yamwe oya tokola ya ka yoge metale li li pomukunda gwawo mpoka. Mokuyoga Peter okwa fa a ka nyengwa komeya nokwa ningine ko. Sho aakuluntu ya ka lombwelwa okwa toka nale na Peter okwa sile mo ngawo. Opolisi, ndjoka ye ya konima yoowili ne aniwa, oyo ye mu kutha mo a hulitha nale.Nakusa Peter okwa li omulongwa pOsikola yEdhina Charles Anderson mOngwediva mongundu ontine, a adhika a uka nuumvo mongundu ontintano. Nakusa Peter okwa li okamatyona ka ndjanga. Ke shi okuya nokuza po neso lyako, otali hokololwa koyendji ye ya shi, kutya olya thiga omwaka omunene megumbo lyawo, pOsikola yawo noshowo mongundu yaanona yakwawo momudhingoloko moka a kala. Nakusa Peter okwa fumvikwa nale ohela mOsoondaha pOmusimboti okuzilila mOngeleka yawo ya Gloria Dei mOngwediva moka omo wo mwa li Oshituthidhimbuluko she mOlyomakaya ga zi ko, komatango.Pokati mpoka otwa kundanene wo kutya okanona kokanasikola poControl Primary School Helena Vatuva oka mana nako oondjenda ombaadhilila sho ka si momeya pOmungwelume manga ka li mefudho koohekulu, Sylvanus Vatuva kOmungwelume hoka mesiku lyOkili. Nakusa Helena , ngoka nayakwawo yaali ya li ya ka teka omeya kokathima pomudhingoloko, otaku tiwa kutya okwa adhika ta kutha uunona uukwawo mbwiya uyali momeya sho wa gwile mo. Moku wu kutha mo, okwa thenunukile mo nokwa ningine ko nokusa. Mboka a li ta hupitha oya hupu. Pokati mpoka otwa kundana wo kutya omumati gwOmunapolotika a tseyika nawa gwo mu Elim mUukwambi mOshitopolwa sha Musati, tatekulu Leonard Mukwiilongo, ano tate Tangeni Mukwiilongo, okwa mana oondjenda dhe omasiku ga zi ko konima yuuwehame. Tangeni okwa fumvikwa poElim okuzilila mOngeleka yawo ya Elim mOlyomakaya ga zi ko, konima sho Oshituthidhimbuluko she sha ningilwa wo mOngeleka moka komatango gEtitano lya zi ko. Nakusa Tangeni okwa thiga ko he, Leonard Mukwiilongo noshowo aamwayina. Aantu 27 oya si omeya muumbangaluntu omathimbo ga piti.