Oipangelo yepangelo otai longo noudjuu mokulanda omiti da fimana

Minista woundjolowele nomayakulo opanghalafano Kalumbi Shangula okwa ti oipangelo yepangelo oya kala tai longo noudjuu mokulanda omiti da fimana oule weedula nhatu da pita.

Okwa li ta popi pefimbo kwa li ta yandje ouyelele koKabinete Omaandaxa.

“Oule weedula nhatu da pita, Namibia okwa kala a taalela omaupyakadi kombinga yokulanda omiti noipumbiwa yopaunamiti moipangelo yepangelo.

“Omatomeno omaupyakadi aa okwa yooloka nokwa kwatela mo oinima ihapu,” Shangula osho a ti ngaho.

Omaupyakadi aa, okwa ti, omwa kwatelwa omaupyakadi opaveta omilandu dokulanda omiti, omilandu dile odo da popiwa mokatendo kokukonga oipumbiwa yepangelo komudo 2015 nokweeta pexulilo oinima ei ngaashi okatendo kokukonga oipumbiwa yepangelo taka pula.

Okwa yandja vali ombedi kovalandi voipumbiwa ei shaashi ihava longo nelitulemo, oinima imwe ihai lixu po naashi oinima imwe hai kwata efimbo lile opo i fike okudja kondje yoshilongo.

Opo kukandulwe po oshinima eshi, oministili otai pula opo oministili yoshimaliwa i kufe pe oinima imwe oyo ya kitakana ngee taku landwa oipumbiwa yepangelo, osho tashi eta opo omiti di kale hadi uya diva, Shangula osho a ti ngaho.

Oministili natango otai kala hai lande meyukililo kovalandifi ovo ve na oipumbiwa pefimbo opo.

Natango vali, Shangula okwa ti okutula po omaudafano eedula dihapu novalandifi voipumbiwa nokulongela kumwe noilongo imwe mokulanda oipumbiwa oku li poshitaafula.

Okwa ti vali otava ka tala kutya ehangano loSouthern African Development Community ohali longifa eendado di li ngahelipi opo va dule okufaafanifa eendado nokufimaneka ongushu yoshimaliwa.

“Omilandu edi oda tameka nale okweeta oidjemo iwa notu na okudilandula pamukalo wa pama. Otu na elineekelo kutya moule weemwedi dishona twa yuka, oupyakadi womiti noipumbiwa imwe yomoshipangelo otau kandulwa po,” Shangula sho a ti ngaho.

OUYELELE KOMBINGA YOUNDJOLOWELE

Natango, eepelesenda di dule po85 dOvanamibia oda tala moipangelo yepangelo nomayakulo opanghalafano oo haa yandjwa moipangelo nomeenhele dihapu odo tadi wilikwa koministili.

Eshi osha kwatela mo oupangelo vashona ve li 322, omandiki oundjolowele e li 56, oipangelo yopaitopolwa i li 34, oipangelo yakula i li inhe noshipangelo shimwe oko ovanhu hava dulu okutuminwa.

Oministili natango otai tungu oshipangelo shimwe mOvenduka.

Moshilongo omu na oipangelo i li lwopo1 150 yopakafimbo.

Shangula okwa ti shi na sha nokuyandja oipumbiwa imwe moipangelo yepangelo, epangelo otali ka tota po eemhito doilonga moikandjohoololo ya yooloka moshilongo.

Oministili otai tula moilonga eeproyeka dokunenepeka nokuxwepopeka okumona omayakulo opaunamiti nopanghalafano.

Shangula okwa ti oipangelo yopaitopolwa paife otai ka kala i na omipepo odo hadi vatele monghalo ya nyika oshiponga. Natango vali, omashina okupanga eefiyo okwa tulwa moshipangelo shaKatutura, Keetmanshoop, Rundu, Oshakati, Otjiwarongo nokOmbaye opo ovanhu vahe ende vali oinano ile nokulongifa oshimaliwa shihapu.

Oshikondo shomayoo nasho osha mona oilongifo imwe oyo ya tulwa moipangelo ngaashi Eenhana, Nkurenkuru, Rungu, Tsumeb, Ondangwa, Outapi, Outjo, Otjiwarongo, Grootfontein, Rehoboth, Opuwo, Onandjokwe noKeetmanshoop.
Minsta okwa ti molonghalo oyo oministli ya li muyo pefimbo lokolona, oministili oya tula omipepo moipangelo ya yooloka moshilongo.

“Eshi osha kwatela mo Onandjokwe, Mariental, Swakopmund, Okakarara noSt Mary Rehoboth, oshoyo Keetmanshop, Okahao, Eenhana, Okongo noshipangelo sha Andara, odo kwa li da tulwa mo muFebuluali 2024. oipangelo ihapu oi na omipepo paife,” Shangula osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News