Ehangano lokuninga omakonakono omilandu depangelo laNamibia ledina Inistitute for Public Policy Research (IPPR) ola pula endiki lokuungaunga noimaliwa ya nyika oulingilingi ledina Financial Intelligence Centre (FIC) opo li ninge omakonakono aa po hapa di oimaliwa yeengudu dopolitika nosho yo omahangano opaveta, unene ngaa kutya omahangano aa omafimbo amwe ohaa longifwa okupitifa oimaliwa youlingilingi.
Omukulunhuwiliki wehangano lokuninga omilandu depangelo Graham Hopwood okwa ti eshi endiki la tala ashike unene komahangano oshiwana nosho yo komahangano opamaitavelo otashi kumwifa.
“Eshi handi pula oshe shi kutya omolwashike ashike oFIC ya tala unene momukonakona omahangano oshiwana neengeleka omanga pu na oikondo ikwao yoshiwana shaNamibia oyo tai monika unene tai dulu okukala i li moupyakadi woulingilingi noimaliwa ihe na eedjo kutya oya dja peni,” Osho a ti ngaho.
Hopwood okwa ti okuyandja oshimaliwa keengudu dopolitika natango oku li inaku yela nawa.
“Novakalelipo vopaveta ovo va longifa omahangano avo mokupitifa oinima youlingilingi nava ningilwe omakonakono. Otu shi shi okudja moFishrot kutya ei oyo oinima tai ningwa nena moNamibia,” Osho a ti ngaho.
“Ehangano lokuninga omakonakono omilandu depangelo kali na oupyakadi wokuluufa kwaasho tashi pulwa kehangano lokuungaunga noimaliwa ya nyika oulingilingi, shaashi otwa itavele kutya omahangano naa kwatelwe komesho pamukalo tau dulu okukalelwa po nopauyelele,” Osho a ti ngaho.
Ehangano lokuungaungau noimaliwa ya nyika oulingilingi oshivike eshi ola shiivifa kutya eengeleka nosho yo omahangano akwao oo ehe li le po okuninga oiyemo taa longele moNamibia naa popya nokuyandja oumbangi waapa pa ndja oshimaliwa shao.
Natango naa kale haa yandje olopota yao yaasho va mona mo yokodula.
Mokunghonopaleka okatendo kehangano lokuungaunga noimaliwa ya nyika oulingilingi komudo 2012, ehangano eli lokuungaunga noimaliwa ya nyika oulingilingi natango ola pumbwa oumbangi kutya oimaliwa ya longwa keengeleka nosho yo komahangano akwao oo ehe li le po okuninga oiyemo oya kalelwa po nawa noya longifwa nawa meni lekotamhango lomahangano aa.
Eshi oshe ya ongombinga yeenghendabala dehangano lokuuungaunga noimaliwa ya nyika oulingilingi dokukelela oumbudi woshimaliwa nosho yo okuyambidida oungangala noshimaliwa moshilongo.
Ehangano lokuninga omakonakono omilandu depangelo ola kala alushe nokupopila elongolopauyelele lakula meesystema doshimaliwa daNamibia.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!