Oilwifo yaIsrael yovakwaita ya pita mefuta laNamibia

Ehangano laNamibia ledina Namibia Ports Authority (Namport) ola ti ombautu yoilwifo yovakwaita va ti i li mondjila yayo ya yuka koIsrael oya pita mefuta laNamibia omafiku aa. Ombautu onhivali okwa li yaanyenwa okutula kOmbaye mEtitano.

Omukulunhuwiliki woNamport Andrew Kanime okwa ti ombautu yotete, oMV Nordic, inai tula petuliloshikepa, ashike oya pita mefuta laNamibia eshi ya finda oku tai ka tula.

Ombauto onhivali, yedina MV Kathrin, nayo ya umbata oilwifo okwa li kwa teelelwa i kanghame kOmbaye Omaandaxa, ashike kakwa li ya pewa oufemba i shi ninge Etitano.

Oshinima eshi oshe ya koluheela konima oministili yomakwatafano opaiwana nelongelokumwe kwa li ya nyolelwa omukanda opo i kelele ombautu iha pite mefuta laNamibia. Ehangano li na sha nomaxupilo nouyuki wopanghalafano ledina Economic and Social Justice Trust (ESJT), ehangano laNamibia li na sha noufemba wovanhu, ola pula etuliloshikepa li kelele ombautu yedina MV Kathrin iha pite.

Momukanda wa nyolelwa Kanime Etitatu la dja ko, omunashipundi woESJT Herbert Jauch okwa holola omalimbililo kutya ombautu yedina MV Kathrin otashi dulika i kale ya umbata oinima ya nuninwa okukalongifwa koita oyo i li koIsrael.

Okwa ti okupitika ombautu i tule moNamibia otashi etele oshilongo shi li dope mokuteye oufemba wovanhu koIsrael.

Omukanda okwa li yoo natango wa tumwa kominista yomakwatafano opaiwana Peya Mushelenga. Kanime oshivike eshi okwa ti oMV Nordic vati oya twala oilwifo yovakwaita koIsrael okudja koIndia.

Shi na sha nombautu itivali, okwa ti MV Kathrin okwa li i na okulandula omilandu dehangano lo paunyuni li na sha noinima yomefuta ledina International Maritime Organisation (MOI), komilandu dopashiwana nosho yo komilandu daNamport.

Kanime okwa ti Namport ina mona nande omikanda daasho sha umbatwa nonghee ita dulu okukoleka kutya ombautu oya umbata oinima ya nyika oshiponga.

Okwa ti ombautu yoMV Nordic, nande ongaho, oya mona omapitikilo aeshe a pumbiwa okuumbata oinima ya nyika oshiponga omanga tai taulula mefuta nokakwa li ya tulululwa moNamibia.

Oshilongo ngaashi Namibia omo ombautu tai taulula ashike kashi na nande oufemba wopaveta wokukelela okuumbata oinima ya pewa epitikilo mefuta lasho.

“Oya pewa oufemba wokupita moNamibia ya umbata oinima ya nyika oshiponga ya pitikwa koveta,” Kanime osho a ti ngaho.