Oikundaneki yopaumwene itai kundaneke nawa koikumungu youkakwashikekookanhu

Oikundaneki yopaumwene moshilongo otaku tiwa itai lopota unene oikumungu ya pamba oukakwashikekookanhu.

Natango, otaku tiwa eengudu dopolitika moshilongo kadi na naana omukalo u wa wokupopya noikundaneki, osho sha ningila oikundaneki shidjuu i shange kombinga yaasho da tula moilonga kombinga yomahoololo, olopota osho ya ti ngaho.

Omukonakoni woinima yoikundaneki Jonh Nakuta Etitatu mOvemnduka okwa li a holola ouyelele ou pefimbo opo kwa li ta yandje ouyele oo u li molopota yoproyeka yoikundaneki kombinga yomahoololo kwa li ya ningwa okudja momafiku 20 Juni fiyo 20 Juli. Ombinga imwe yolopota oya kwatela mo okutala efikopamwe loukakwashikekookanhu nosho yo lovakainhu. Olopota oya ulika kutya oikundaneki yepangelo oyo kwa li i li komesho mokukundaneka oinima i na sha noukakwashikekookanhu.

“Oikundaneki yopaumwene nai uye mondabo kombinga yoikumungu youkakwashikekookanhu. Oikundaneki yopaumwene otai monika ya fa ihe wete oikumungu yopaukakwashikekookanhu. Eshi tu wete osheshi kutya oikundaneki yepangelo otai longo noudiinini kombinga yoinima ei,” Nakuta osho a ti ngaho.

Omudindi woshifokundaneki shoNamibian Sun Toivo Ndjebela Etitatu okwa pula omahangano oo ekwetele komesho oinima ya pamba oukakwashikekookanhu a longele kumwe a yandje ouyelele nosho yo omahongo koinima ya pamba oukakwashikekookanhu.

“Ihatu toto eenghundana fyee ongovatoolinghundana, opu na okukala pu na oshitufi shonumba opo tu dule okukundaneka.

“Tuleni oshikondo shoukakwashikekookanhu mopolifi yaNamibia, okomitiye yopaliamente kombinga youkakwashikekookanhu nosho yo omahangano akwao a longele kumwe noikundaneki ndee taa lwifa oikumungu ei pamwe,” Osho a ti ngaho.

“Opwa kala pu na okukundaneka kuhapu kombinga yomashenge nosho yo oiwana ihapu, ashike nee, natango shihapu otashi dulu okuningwa,” Ndjebela osho a ti ngaho.

Shimwe vali, olopota oya ulika kutya okwa li kwa kundanekwa unene kombinga yoSwapo, kwa li kwa shangwa omahokololo e li 860, oo e lile po eepelesenda 41.

Olopota natango oya holola kutya oikundaneki yepangelo oya kundaneka kombinga yoSwapo shi dulife eengudu dikwao.

Ongudu yoNamibia Economic Freedom Fighters (NEEF) okwa li kwa kundanekwa kombinga yayo oikando 277.

Nakuta okwa ti eengudu dopolika kadi na omikalo da tulwa po dokupitika oikundaneki i lopote kombinga yoivilo ile yoikumungu yonumba.

“Oshidjuu okumona oinima yongudu shaashi oikundaneki ohai lopota kwaasho ya lombwelwa ndele ihai toto ashike oinima,” Osho a ti ngaho.