Oibofa yomahepeko opaukakwashikekookanhu mOshana otai shuna pedu

Ngoloneya woshitopolwahoololo shaShana Elia Irimari okwa ti oshitopolwahoololo osha didilika eshuno pedu loimbuluma yopaukakwashikekookanhu okudja odula ya dja ko.

Okwa ti oimbuluma moshitopolwahoololo oya wa pedu okudja poibofa i li 646 oyo kwa li ya lopotwa odula yandja ko okuyelakanifa noibofa i li 328 oyo ya lopotwa neudo pefimbo la faafana naalo lodula ya dja ko.

Irimari eshi okwe shi popya pefimbo kwa li ta yandje ouyelele kombinga yaasho tashi li nyenge moshitopolwahoololo kOshakati Etitano.

“Onda hala okupula ovanhu opo va twikile nokulongela kumwe nokomisi yokulwifa oimbuluma nosho yo opolifi yaNamibia. Okulongela kumwe nomahangano okukwatela po oveta aNamibia oshinakuwanifa shetu opo tu dule okulwifa oimbuluma yopaukakwashikekookanhu, oimbuluma yoludi keshe nosho yo oulingilingi moshitopolwahoololo shaShana,” Osho a ti ngaho.

Irimari okwa ti kutya nande onghalo osho i li ngaho, ongudu yopolifi moshitopolwahoololo otai twikile nokulonga noudiinini opo i kufe mo ovalongi voimbuluma aveshe moshiwana.

Eshi osha kwa tela mo okuxwepopeka nghee opolifi noshiwana shi na okulwifa oimbuluma yopaukakwashikekookanhu.

Okwa weda po vali kutya ongudu yeameno moshitopolwahoololo oya ninga eenghendabala dokuyambula po oveta nelandulafano opo i dule okuwilika eameno loshitopolwahoololo.

“Oimbuluma okwa li ya shuna pedu kashona neepelesenda 0,74 okudja poibofa i li 12 5676 oyo kwa li ya lopotwa momudo 2022/2023 okuyelakanifa noibofa yomudo 2023/2024.

“Nande oimbuluma ngaashi ominyeka noumbudi wokaheka oya kala tai i pombada momudo ou, otwa pandula shaashi ovanambelewa veameno ova kala tava longo noudiinini va konge ovanhu ava opamwe nelongelokumwe loshiwana,” Irimari osho a ti ngaho.

Irimari okwa popya vali kutya oshitopolwahoololo shaShana osha dengwa neenghono koshikukuta nomaumbo e li 16 010 otaa mono oikulya yoshikukuta okupitila mopolohalama yombelewa yomuprima minista.

Okwa popya yoo vali omaupyakadi amwe oo oshitopolwahoololo sha taalela, ngaashi omeva inaa wana oinima younamapya nounaimuna , ominino da kulupa, ondodo yokuhena oilonga i li pombada nosho yo onghalo yomhepo ya lunduluka oyo tai eta oupyakadi koikulya yovanhu noimuna.

“Okuyandja omaumbo moshitopolwahoololo shaShana natango oku li oupyakadi wakula ngaashi naana shi li oshilongo ashishe, nosho yo oupyakadi woshimaliwa sheengeshefa dishona nodopokati moshitopolwa, okulikufila edu nokulitula eedalate shihe li paveta ,” Osho a ti ngaho.