Ohorongo ya mono omukuli ku Europa

EHANGANO lyokulonga osamende ndyoka ta li tungu omupepo gwokulonga osamende pofaalama yi li kuumbangalantu wOtavi oya mono omukuli gwoodola obiliona yimwe opo yi tsikile netungo po lyofabulika ndjika.

Ohorongo Cement oyi li nale miilonga nokutunga ofabulika ndjika, na oya pumbwa iimaliwa ayihe kumwe oodola oobiliona dhili mbali netata opo yi manithe iilonga mbi.Ehangano olya mono omukuli oku za kOmbaanga yomapungulo ya Europa[EIB].Omupevi peresidende gwo EIB, Plutarchos Sakallaris ngoka ta longo nAfrica okwa koleke kutya ombaanga ye oya pandula okugandja iimaliwa mbika kOhorongo Cement no pamukalo nguka ota yi yambula po omahupilo gomuumbangalantu wa Namibia.’Otwa taambako omathaneko gehangano ndika kutya ofabulika yalyo ota yi gwanitha po iipumbiwa noshowo omuthika gu na sha negameno lyomudhingoloko.Otu uvite ishewe nawa molwaashoka ehangano ndika ota li ka gandja iilonga no ta li ka hwepopeka onkalamwenyo yaantu yomomudhingoloko ngoka’, Sakallaris a ti.Iimaliwa yomukuli nguka ota yi longithwa okufuta eshina lyokunyanyula omamanya niilongithwa yimwe moka hamu zi osamende.Iikwawo ota yi longithwa woo okutunga ondjila ndjoka ta yi fala iiyenditho kofabulika hoka,olutenda okweeta oondongelwa noshowo omagumbo gaaniilonga mpoka.Ehangano lya DEG ndyoka li li oshilyo shombaanga ya Ndowishi yedhina KfW nOmbaanga Yomapendulepo yUumbugantu wAfrika oya gandja woo ooeuro oomiliona 250 molupe lwomukuli kehangano lyOhorongo opo li tsikile niilonga yalyo.Iilonga yetungo lyofabulika yosamende yOhorongo ota yi humithwa komeho kehangano lya SchwenkZement, ndyoka li li miikaha yezimo limwe moNdowishi. Na olyalongo osamende niitungithi yimwe moshilongo shoka, uule woomvula 160.’Ohorongo Cement ota yi kala nompito, oku mona uungomba nontseyo oyindji oku za kehangano lyaSchwenk, unene melongitho lyiikwamahooli ngaashi iikuni nosho tuu. Elongitho lyiihwameki yimwe ota li kwathele moku shonopeka eyo olindji lyolwithi mombanda, na oshilongo ita shi ka tumina mo osamende oyindji, omakalamanya, noshowo omahooli,Gerhard Hirth, omuwiliki gwongundu ya Schwenk, ngoka woo eli omunashipundi gwOhorongo Cement a ti.Pethimbo lye talelopo kofabulika yOhorongo Cement ndjoka yi li pokati koShomeya nOtavi SchwenkZement okwa ulike ehangano ha li ithanwa Energy for Future ndyoka ta li konakona elongitho lyuupambu wiiti moku gandja oonkondo kofabulika ndjika.Ndele etokolo okulongitha iikwa kuni mokugandja oonkondo olya tegelelwa li ningwe pehulilo lyomvula ndjika nenge petameko lyomvula ta yi ya.Schwenk okwa itaala kutya ofabulika ndjika ota yi vulu okulongitha ootona 80 000 dhiikuni, komvula opo yi gandje oonkondo mokulonga osamende.Ota ku tiwa ohectara yimwe yiihwa ota yi vulu oku longa ootona 20 sigo 30 dhiipambu yiikuni.Ofabulika yOhorongo oya tegelelwa yi manithwe okutungwa omumvo 2011 na ota yi kala ha yi longo ootona 700 000 gosamende omvula kehe. Ota yi kutu miilonga aantu 300 noshowo aantu 2 000 miilonga pomahala galwe mekwatathano nofabulika ndjika.