Ohorongo cement natango yi indikwa oku landithwa Angola

EPANGELO lya Angola natango ina li kuthapo oondjindikila okwiindika osamende ya Namibia yi landithwe moshilongo shoka.

Oondjindikila ndhika dha tulilwepo omumvogu odha li dhina oku kuthwapo lwopehulilo lyomumvo ogo tuu ngoka. Ndele sigo oompaka shika ina shi ningwa, shoka sha ningwapo osho owala okugandja oombapila dhuuthemba wokulanda osamende okuza moNamibia kaanangeshefa yAngola okweetamo osamende noshowo iilongomwa yimwe ngaashi epungu, noohi oku za moNamibia. Omukwatheli gwopaumwene gwomuwiliki gwa Ohorongo Cement, Yvonne Hass okwa ti sigo oompaka yo ina ya tuminwa etseyitho lyopambelewa kombinga yoondjindikila. Hass okwa ti shoka yuuvite ooshika kutya epangelo lyaAngola oha li gandja oombapila kaanangeshefa yoshilongo shoka opo ya lande nokufala osamende okuza moNamibia oku ya ko Angola. Okwa tengenekwa kutya Ohorongo Cement oya li ya kanitha tashi vulika iimaliwa yomwaalu gwoodola oobiliona mbali oshinkwanu ntano molwaashoka inaali vula oku landitha osamende yalyo moshilongo shoka, omolwa oondjindikila ndhoka. Oondjindikila odha tulilwepo mu Juni omumvo 2011 sho Angola a li a indike elanditho lyosamende yokutungitha a tile moshilongo omwa li unene osamende yoludhi ndoka oyindji noonkondo. Opwa l ishewe oonkundana dha hokolola kutya Angola okwa ningile Namibia oondjindikila dhosamende oshoka moshilongo shoka na mo omuna woo oofabulika odhindji hadhi longo osamende. Ndele osamende ngaashi ndjoka yoku tulithamo uutiyelesa natango ota yi vulu oku landwa oku za mo Namibia noku tumwa ko Angola. Etseyitho ndika lyoondjindikila olya li lya piyaganeke aafali yoondongelwa mboka oololi dhawo dha adhikile dhili pomweelo gwokoongamba unene tuu pOshikango dhi ilongekidha oku fala osamende kaalandi moAngola. Oyendji yaamboka oya li nomauvathano naanangeshefa yomo Angola oku ya tumina osamende. Ofabulika yohorongo oya tungwa kwa li nelalakano oku landitha woo osamende yimwe yayo kiishiindalongo mwakwatelwa Angola hoka ya li ya thaneka okutmina ootona omayovi omathele 250 000 sigo 300 000 lwaampoka unene tuu muumbugantu woshilongo shoka.Ofabulika yOhorongo Cement oya tungilwe uule konyala womimvo mbali dhuudha kaatungi aaChina . Ofabulika ndjika oyina oonkondo oku longa ooshako dhosamaned dhondjundo yotona omayovi omathele ga heyali komumvo ngele ota yi longo shuudha. Konyala osamende yootona omayovi 700 000 komumvo. Namibia oha longitha konyala osamende yootona omayovi omathele 400 000 komumvo onkene osamende ndjoka yootona omayovi 300 000 oya li ya thanekwa oku landithwapo koAngola noshowo kiishiindalongo yilwe muumbugantu wAfrica. Omumvo Ohorongo cement oya landithile konyala ootona omayovi 18 000 gosamende ko DRC, na oya thaneka okulanditha koBotswana.