Ohauto ya Nujoma konyala yi pumwe

OMULUMENTU omugundjuka okwa kwatwa kopolisi metiyali.Ekwato lyomumati nguka olya landula sho ta ku tiwa okwa hingi nuuhasha nokonyala a pume osheenditho shomukokoliperesidende.Okuhinga kwe otaku eta eipulo kutya pamwe okwa li ena elalakano lyokudhipaga omukokoliperesidende.

Oshiningwanima shika osha ningwa mondjila onene pokati kOndangwa nOngwediva pomukunda Akweenyanga konyala lwopethimbo lyomwiha metiyali. Oshinima shika osha thikameke uumbangalantu auhe konima sho onkundana ya uvika kutya omusamane Sam Nujoma konyala a monithwe oshiponga.Omuhingi gwosheenditho sholudhi lwo Golf yolwaala lwehuli ota ku tiwa okwa hingi osheenditho she ta yi pokati noku za pokati kosheendo shomukokoliperesidende. Shika aniwa okwe shi ningi mokuhinga inaaku silwa oshimpwiyu. Omuhingi nguka okwa thiminikwa a thikameke osheenditho she kiiyenditho mbyoka ya li ta yi landula osheenditho shomukokoliperesidende, omuhingi nguka okwa kwatwa nokwa li ta pulwa komiyadhashinana.Ota ku hokololwa kutya nakuhinga nguka ethimbo limwe okwa hingi osheenditho she komeho gaashoka shomukokoliperesidende.Oonzo dhaagameni dhepangelo odha lombwele oThe Namibian kutya omufekelwa nguka okwa li ta hingi konyala ondapo yookilometa 200 motundi.Omufekelwa okwa kwatwa na ota pulwa metamaneko lyokuhinga nuuhasha.Aanambelewa aakuluntu mepangelo oya lombwele oThe Namibian kutya ota pa ka ningwa omakonakono gomuule pu talike ngele, oshiningwanima shika oshi na elalakano lyontumba ewinayi unene kombinga yomuhingi nguka.Othe Namibian oya tseyithilwa kutya mosheenditho shomumati nguka omwaadhika omandini gohasa. Ndele na ku hinga okwa lombwele opolisi kutya oha longitha ohasa ngele ta pangele okila dhokutalaleka esiku kehe.Nonando opolisi ota yi ti shika oshiningwanima shu ukilila, aanambelewa aakuluntu yamwe yepangelo ota ya fekele pena sha li sha longekidhwa.Omusamane Nujoma ota ku tiwa oku li nawa, oshoka oshinima shika ina shi mu guma.