Ohandje ya pandulwa mokukalekapo oushitwe

EHANGANO lovanhu ovo hava longo oihongomwa yokomake ledina Ohandje Artist Cooperative, ola pandulwa molwaashi tali kambadala oku kaleka po oushitwe moshilongo, oku diilila mopoloyeka yalo yokutwika oivale.

Oshoongalele shehangano eli shokOmudo shali sha ningilwa mEndiki lOvanyasha mOshakati osha li sha endele pamwe neyandjo lomapapa koungundu nosho yoo oohandimwe ovo va longa noudiinini moilongomwa ngaashi oimbale, omatiti, omalilo naihapu oyo ya landifwa noku eta oiyemo yakola mehangano.
Eshi kwali ta popifa oilyo yOhandje, meme Fredrika Luanda okwa pandula eholokepo nelitulemo unene loomeme mehangano lavo nokwe vatwa omukumo va ye komesho nokulonga noudiinini.
‘Etanga olili momake eni opo mu tameke oku fila oshisho oumeno voivale ovo mwa twika fiyo va kula nokuteywa.Fileni yoo oshisho oilongifo mwei pewa oili momake eni nge ya vakwapo tamu yi lopota kolopolifi.
Kwateni yoo omeva eni nawa nokwaalongifa noukeka,’ osho Luanda a popya pefimbo ta yandje olopota koungudu ovo kwali va pewa omadeulo okutwika oivale mOnooli neudo.
Okwa tumbula kutya oungudu okwali va pewa oilongifo ngaashi eedalate domaluumbo, eepaipi domeva, ounete vomudile noshoyo oimaliwa yokutulifamo nokulongia omeva.
Pefimbo loshiindingili pEndiki lOvanyasha mOshakati mEtitano ladjako osho kwali tashi mwenyekwaa momaimbilo koomeme nootate vanhukapo noshoyo oipopiwa ya yooloka, opwa shiivifwa yoo kutya ehangano lOhandje ola taalela oilonga yakula neudo omo mwa kwatelwa oku dika endiki lavo mOndangwa noshoyo oku hoolola elelongundumutima lipe kuyele meemwedi dili komesho. Ohandje oya pandula ehangano la European Union eli la yandja oshimaliwa shoku tungifa endiki leembwelewa eli, Muni waNdangwa eshi evapa edu lokutunga ombelewa omaano noshoyo ovayambididi vahapu vehangano mwakwatelwa ehangano laPambili.
Endiki eli otali ka kala lina endiki leembelewa, okefe yovatalelipo, oshinyanga shoku ulika oilongomwa yehangano eli, onhele yokukanghameka oihauto noshoyo ondjibololo yakula yoku hongela oiyuma.