Ofaabulika yomamate gomafufu goonzi pOniipa

PONIIPA mOndonga mOshitopolwa sha Shikoto omwa etwa Ofaabulika yOmamate gongushu haga ningwa momafufu gOonzi yedhina Dorkambo Co-operative Namibia, yi li mewiliko lyomusamane Samwel Sheyanena.

Omusamane Sheyanena ota hokolola kutya Ofaabulika ndjika yokuninga omamate gomafufu goonzi, oya totelwe po komumusamane gwOmundoishi Volker Berner, ngoka e yile moNamibia momumvo 1966 noku yi tota nee momumvo 1969 mOfaalama ye yedhina Dorka Teppiche popepi nOmatala okuuka koGobabis lwaahoka. Omundoishi nguka tate Berner, sho a toto po Ofaabulika ye ndjika yomamate gomafufu goonzi, okwa kala ta kutu aaniilonga te ya kutha kOshitopolwa shoka kwali hashi ithanwa nale Owambo. Aaniilonga ye mbaka te ya longo nawanawa okuninga omamate gomafufu goonzi nokukala nee te ga landitha nokwiilikolela oshimaliwa shawo ngeyi. Omamate ngaka, ogongushu nogondilo, haga adhika unene mOohotela nomomatungo gondilo, ngashi ngoka gEpangelo nosho tuu.Momumvo 2007, sho omusamane Berner e li po kuya moshi[pundi shevululuko momumvo 2008, okwa ningi etokolo kutya sho ta yi moshipundi shevululuko, Ofaabulika ye ndjika ote yi pe po aaniilonga ye kumwe niioongitho ayihe yayo. Ta tokola wo kutya, otashi ka kala oshiwanawa ngele tayi yi kOwambo koNooli. Aaniilonga ye oyendji oya zile mOndonga, noya uvathana nayo ya ka tule Ofaabulika yawo ndjika mOniipa mOndonga nokutsikila niilonga yayo nombili, taya longo ngashi naanaa e ya longa. Taya kala nee ye na iilonga notayi imonene oshimaliwa. Berner okwa kongo omuntu e na elongo, ngoka ta vulu okulonga nkene iilonga mbyoka yokuninga omamate momafufu goonzi hayi ende nenge hayi longwa.Unene tuu e mu longe ewiliko lyiilonga mbyoka ngashi naanaa a kala he yi wilike. Okwa mono po nee omusamane Samwel Sheyanena momumvo 2007 nokwe mu longo iilonga yokuwilika iilonga mbika uule womvula. Momumvo nee 2008, Berner pamwe na tate Sheyanena oya eta Ofaabulika ndjika naaniilonga yawo ye li pomulongo nayatu nasha lwaampoka kOniipa kOndonga mOshitopolwa sha Shikoto. Taya ya yi nee kOngeleka ya ELCIN pOniipa nokupewa Ongulu onene moka ya tula Iikwamashina yawo nokutameka taya ningi omamate gawo gomafufu goonzi.Ofaabulika yawo ndjika oye yi luku nee Dorkambo Co-operative Namibia. Omusamane Sheyanena ota ti kutya mOfaabulika yawo moka oku na mo aaniilonga omulongonayahamano (16) ashike ohaya longitha wo yamwe yokuhelufuna omasiku gamwe. Omafufu goonzi ota ti ohaye ga landa ko Agra kOvenduka noye gana ogendji lela. Omashina taya longitha oongoka gomodela onkulu lela, gokomake. Ta ti oshi li nawa oshoka otashi pe aantu oyendji iilonga nontseyo yokulonga omamate gomafufu goonzi.Omashongo ye na, tate Sheyanena, ota ti kutya ogOomaaketa, ano gAalandi yiilikolomwa yawo mbika, opo ya mone oshimaliwa sha gwana shokutamununa mo Ofaabulika yawo, unene okukuta aaniilonga oyendji ya gwana okulonga iilonga mbyoka. Nande ongawo, Sheyanena ota ti, oye na ngaa mboka haye ya landa ngashi yamwe yoku Amerika noko South Africa, omanga mo Namibia ye na mo ohaandimwe noye li taya kongo natango ookuume hoka taya vulu okulanditha omamate gawo ngaka. Ta ti wo kutya Aatalelipo oyendji, otaya ende taye ya tseya, naampoka ye li, notayer ya landa wo nawa omathimbo nomathimbo.Tate Sheyanena, ota ti oye na po nee edhilaadhilo, lyokunkondopeka Ongeshefa yawo pamukalo gwoku yi kongela Ongunduwiliki ya kola opo iilonga yi ende nawa. Ta pandula noonkondo omusamane Brener sho a ninga etokolo ewanawa nolyapumba okugandja eliko lye kaaniilonga ye, omagano omanene ge thike mpoka. Ta pandula wo Ongeleka ya ELCIN sho ye ya pa ehala ya longele mo noshowo nee ayehe taye ya yambidhidha miilonga yawo mbika ya simana. Omamate gawo ota ti oahye ga longo ge na omathano giikwatelela kiinima yopamuthigululwakalo gwAanamibia, shoka shi holike unene kaakwiilongo mboka haya landa omamate gawo. Tate Sheyanena ta indile koshigwana, unene tuu shoka oshinangeshefa shi kale hashi ya talele po pongeshefa yawo mpoka. Omusamane Sheyanena ota monika kongodhi ye yonomola ndjika 0812110048.