ODTA ya pangula oshipopiwa sha Nujoma

ONGUNDU yoDTA oya pangula oshipopiwa shomukokoliperesidende sho a popi pOngwediva ehuliloshiwike lyayi, sho a ti Aaingilisa na ya dhengwe noohamala momitse.

‘Oludhi lwomupopyo nguka ota gu hongakanitha no ina gu gwana okupopiwa komuleli nale gwoshilongo shika, unene tuu sho te shi ningi sha ukililithwa aazazayi, oshoka ota shi nyateke efano lya Namibia na, ota shi tilitha aapunguli oku ya koshilongo shetu, na oshilongo ota shi vulika shi ka nithe omayambidhidho giilongo yopondje pashimaliwa’amushanga ndjai gwoDTA McHenry Venaani a ti metitatu.’Ota tu indile omuperesidende Hifikepunye Pohamba ngoka oye eli omuwiliki gwoSwapo a indile omusamane Sam Nujoma, he yoshigwana opo a gandje ombili,’Venaani ta indile.Nujoma aniwa okwa ti Aandowishi oomvula ethele dhapiti oya zigopeke iikweyo yomeya okuehameka nokudhipaga aapopi yOshiherero aaNamibia konima yo sho ya kondjitha uukoloni wAandowishi,okwa popi woo nayi kombinga ya Ingilisa mboka aniwa ya hala okweehameka Zimbabwe nepangelo lyomuperesidende Robert Mugabe.Zimbabwe osha li oshipangelwa longo sha Britania.’Iitya yomukokoliperesidende Nujoma ota yi vulu okumbandameka aatalelipo yoshilongo shoka muka, oshoka ota ya tila kutya pamwe ota ye ya, ya dhengwe noohamala momitse ngele ta ya thiki pokapale ka Venduka,’Venaani ta gwe dha ko.’Nujoma okwa popi shika poshigongi shoSwapo na otwa tegelela eyamukulo lyontumba ando li ze kongundu ndji, ndjoka sigo oompaka ya kala ashike ya tya thilu kombinga yaashika.’Pa Venaani omupopyo gwa Nujoma ota gu yono omautho geihumbato gopapolitika ngoka ga shaininwe koongundu adhihe mo 1999.Omautho ota ga ti aapopi piigongi mbika ina ya longitha elaka ta li hongakanitha nokufala muuhwapindi wontumba pokati kaantu.Oongundu kadhi na oku gandja oombapila ndhoka dhi na omashango ta ga hongakanitha.Omautho ota ga utha kutya aawiliki yoongundu dhopolitika oye na oku lombwela aayambidhidhi yawo ya simaneke omautho geihumbato ngaka, na oye na oku kutha oonkatu dha pumbiwa opo ya se oshimpwiyu kutya aayambidhidhi niilyo yoongundu dhawo ota ya iyutha komalombwelo ngaka. Kuyele nuumvo omusamane Nujoma okwa li a popi montaneho kutya Aandowishi na ya yahwe pokati komeho. Othe Namibian oya kundana kutya, aakwatelikomeho yaakalelipo yiilongo moNamibia oya pula Uuministeli wIikwapondje yi gandje efatululo kombinga yomapopyo gomukokoli peresidende.