Odama ya Neckertal ta yi ambidhidhwa

AANTU oyendji oya panda ethaneko lyepangelo okutunga odama yaNeckertal momulonga gwa Fish konyala ookilometa 40 muuninginino waKeetmanshoop.

Shika ngele osha ningwa ota shi ka yumudha po ondunge ya etelwepo kepangelo lyuukoloni lyaaNdowishi oomvula ethele dha piti.Poshigongi shokupulakena aakwashigwana moKeetmanshoop metine lyoshiwike sha yi ,aantu oyendji oya gandja eyambidhidho lyawo ketungo lyondama ndjoka, ta yi vulu okweeta uuwanawa molupe lwomeya gokutekela iikwamapya yoshigwana moshitopolwa shoka.Aakwashigwana oyendji yomomudhingoloko oya pula ashike uuwanawa mboka taya mono oku za kodama ndjika palupe lwiilonga ngele odama ya pu okutungwa.Ndele yalwe oya li woo ya pula kombinga nkene etungo lyodama ta li ka guma onkalo pa mahupilo noshowo pankalathano, nongele aakwashigwana ota ya kala ta ya tseyithilwa nkene shika ta shi ya gumu. Noshowo ngele ota pu ningwa ekonakono, ngele iizemo yalyo ota yi ka tseyithwa puuyelele. Omukuluntu ena sha nomeya nale omusamane Piet Heyns okwa pula ngele iimaliwa yokutungitha odama ndjika oya monika nale, mbyoka yi li lwopoodola oobiliona 2,4.Omutseyi nawa gwomudhingoloko, Amelia Briel okwa yamukula ta ti omushangwa hokololo guomudhingoloko ota gu ka gandjwa koshigwana. Omanga omudirector gwegandjo lyomeya komikunda omusamane Koch okwa ti iimaliwa yo kutunga odama ota yi zi komagano ngoka taga gandjwa kiigwana yuuyuni, okwa ti iimaliwa ikwawo ota yi hehelwa molupe lwomikuli ta dhi zi momahangano gomuuyuni.Okwa tsikile ko tati iimaliwa mbika ya pungulwa modama ndjika ita yi ka monikwa mo andola, nelalakano lyodama ndjika olyo okweeta po ehumokomeho nokweeta po oompito dhiilonga, noshowo okuyambula po onkalamwenyo yaantu moshitopolwa.Mboka ye na omahala mpoka oya pula kutya ota ya vulu oku opaleka omahala gawo ngoka ge li popepi mpoka, ngoka ta shi vulika taga kala oshitopolwa shomapya taga tekelwa?Ndele Koch okwe ya pe omayele kutya naya kaleke manga omathaneko gawo okupungula mevi lyawo sigo omakonakono ge nasha netungo lyodama oga pu muMaalitsa 2010, shoka ta shi ka ulika kutya openi pe li nawa noku tekela. Okwa ti omahala gokutekela otaga ka tendwa na otaga ka landithwa.Uuhwenge kombinga yompito yokuyelulwa kwehala lyomafudhilo lya Ais-Ais owa li woo wa ulikwa ku yamwe yoomaantu mboka ya li mpoka. Briel okwa ti ekonakono ota li tala kehe shimwe nuukeka, nehangano ndyoka ta li ningi omakonakono ngaka oli na einekelo enene moingeer dha lyo kutya ota dhi ka mona kutya shika otashi yandwa ngiini, unene tuu kutya ekuma lyodama ota li kolekwa ngiini kaa li tekepo nando. Ndele Koch okwa ti ngele ando ekuma oli teke nena Ais-Ais ota ka ya kohi yomeya.Odama ndjika ya thanekwa otayi kala yi na omatondokelo goombinekilometa 45 365. Ngele oya pu okutungwa otayi kala odama onenene moshilongo yi vule ya Hardap ndjoka oyo yi li onene kwaadhihe pethimbo ndi.Etungo lyodama ndjika olya tegelelwa li tameke mu Apilili 2011.