Ocash loona tadhi thipi aaNamibia noonkondo

AANAMIBIA oya indila konyala oodola obiliona mbali oku za komahangano goocash loona pokati komimvo 2003 sigo 2007, olundji oonaku lya oongunga ndhika oya futithwa iihohela ya pitilila ooperesenda 30 ngaashi sha uthwa kompango yi na sha nokulya omikuli(Usury Act).

Onkalo oya tegelelwa yi ka nayi pale. Shika ota shi kala ngaaka unene tuu sho ondjele yengushuluko ya uka pombanda naandjika ota yi thiminike aantu oyendji opo ya hehele iimaliwa ya vule okuhupa.Ehangano lyokutonatela omahangano giimaliwa kaageshi oombaanga lya Namibia hali ithanwa Namfisa olya popi ndhika momushangwa hokololo gwalyo gwongashingeyi.Oongeshefa dhoocash loona odha indjipala oku za omumvo 2002, pamishangwa dha Namfisa.Oku za poongeshefa 34 ndhoka dha li dha shangithwa mo 2002, oshikondo shika osha futunukamo nooperesenda 630 sigo opo mahangano 249 ganyolwa pampango mo 2007.Nuumvo ayike omahangano goocash loona geli 38 ogi ishangitha. Ndele oshikondo shika osha piyaganekwa kwaamboka ha ya ithanwa omashark gooloona, omushangwahokololo ta gu ti.Namfisa okwa taamba omanyenyeto kombinga ya yamwe moongeshefa ndhika aniwa ta ya pula iihohela oyindji, yamwe ota ya gandja iimaliwa pwaana eitulemo,yamwe ota ya kuthako iimaliwa yawo koondjambi dhaa heheli ina ya pewa epitikilo omanga yamwe yeli moshimpungu shika ota ya longo kaashi shi pampango.Ishewe omanyenyeto gamwe oongoka gaa indili yoocash loona taya futithwa iimaliwa oyindji yoku konga mo oongunga muyo uuna ndoka ina ya gwanitha po euvathano nenge ina ya futa oongunga dhawo.Pamishangwa dhongashingeyi dha Namfisa omahangano goocash loona oga futa konyala ooloona dhi li petata lyomiliona, dhongushu yoodola konyala obiliona yimwe mo 2007.Ooloona adhihe kumwe 478 124 dhongushu yoodola oomiliona 536 odha pelwe aaindili ye li 394 696.Omwaalu gwaantu mboka ya indile iimaliwa oku za koocash loona ogwa londo pombanda nooperesenda 75 oku za paantu 70 162 moshikako shotango shomumvo 2007 sigo opaa indili 122 608 moshikako shahugunina shomumvo ogo tuu ngoka..’Omwaalu gwaa indili yoongunga ogwa yi pombanda omvula ndjoka.Shika ota shi vulika shaningwa omolwaashoka iihohela oya li ya londo pombanda pethimbo ndyoka, naashika osha thiminike aantu ya indile iimaliwa opo ya vule oku gwanitha po oompumbwe dha wo dhimwe.’ Namfisa ta ti.Ehangano ndika olya ti paku tala , ota shi ulike kutya aaheheli oyendji oyo mboka haya hehela kehe omwedhi. Mbaka oha ye shi endulula kehe omwedhi konyala.Omishangwa dha Namfisa ota dhi ulike kutya omiyalu ndhoka dha indilwa kaaheheli oha dhi kala pombanda pethimbo lyoshikako oshititatu shokomumvo.Mo 2007 ondjele yiimaliwa ya hehelwa oya li pomwaalu gwoodola 1 002 na 1 195 moshikako shotango noshikako oshitiyali, omanga moshikako oshititatu oongunga ndhoka dha indilwa odha li oodola 1 222 na 1 058 moshikako oshititatu noshitine.Ondjele yomwaalu gwa hehelwa pokati koomvula 2003 na 2007 oya kala inaa yi lunduluka yi li pokati koodola 1 019 sigo oodola a 256.Shika ota shi koleke ishewe kutya oonaku indila oyendji oomboka ha ye shi ningi omwedhi kehe. Onkene ota shi vulu okwiitaalwa kutya omwaalu omunene gwaaheheli ogwaa mboka ha ye shi ningi aluhe oku ya thikitha kekwato lya landulako omwedhi kehe.Namfisa ta ti.