Nujoma a geela Aaingilisa nAamerika

PETHIMBO ta popitha oshigongi oshinene shOswapo mOngwediva moShana mOlyomakaya ga zi ko, Omukokolipresidende Sam Nujoma okwa popi nomuthindo a uka mAaingilisa noshowo mAamerika moka kutya oye li po taya hepeke iigwana iikwawo, unene ngashi mbyoka yomoAsia, ano mo Iraq nomu Afghanistan, ye wo te ya pe ombedhi onene sho taya tsikile okutulila mo Zimbabwe oondjindikila dhaa na uuyuki.

Omukokolipresidende Nujoma ta ti Aaingilisa nAamerika, otaya uhala taya lombwele aantu Uudemokoli nUuthemba wOmuntu omanga oyo naanaa aayoni yuuthemba nUudemokoli waantu muuyuni. Taya hepeke nayi ookuume ka Namibia mu Asia moka nosho tuu moZimbabwe.’Taleni sho taya ningile Zimbabwe oondjindikila noku dhi kaleka po dhaana uuyuki. Ondi shi omuntu oto tulile mo omuntu oondjindikila ngoka wu na naye iita? Zimbabwe oku na iita nayo? Onda luka Zimbabwe, ano Omupresidende gwa Zimbabwe, okwa kala ashike ta unganekele aantu ye evi lyawo, lyomoshilongo shawo, mboka ya kala kaye na evi. Omukokolipersidende okwa tsikile ko ta ti Namibia na kale a kotokela aantu mboka, oshoka oya hala okuya mo taya pitile moongundu dhontumba. Omukokolipresidende ta indile kAanamibia ya kale kumwe mOswapo nokuhogolola aaleli yawo ya kola yOswapo, mwa kwatelwa naagundjuka mboka ya valwa konima yemanguluko lya Namibia. Omukokolipresidende ta gandja ombedhi kwaamboka ya shanga moThe Namibian, aniwa ye ti 14 Septemba 2009 kutya mboka ya valwa konima yemanguluko lya Namibia ita ya ka hogolola. ‘Ya takamitheni, oomboka, haya shanga uumbapila,’ Omukokolipresidende Nujoma ta ti ngawo nokutsikila ko ta ti kutya yo yiilongo yomoSADC oya tokola kutya ngoka to ningi nayi shimwe shomiilongo yomoSADC, oto katukilwa onkatu kiilongo iikwawo mbyoka meendelelo ngashi tashi vulika. ‘Ngoka to nyenge gumwe gwomoSADC owe tu nyenga atuhe. ‘Omukokolipresidende Nujoma ta ti ngawo nokutsikila ko kutya Aatiligane oye shi igilila okukolonyeka omuluudhe. Ta ti okuza ngaa kOmuputu nooyakwawo oya kala taya kolonyeke aaluudhe noku ya ninga aapika. Ye ya kutha mo Africa lyawo noku ya taagulukitha omafuta noosikepa taye ke ya landitha po muupika ko America nosho tuu. Mboka ya ehamena mOosikepa moka noya sila mo oya umbilwa ashike momafuta moka. Omukokolipresidende Nujoma ta ti, Namibia na shonge omaimperiale ngoka nomukalo gwokwiilonga mosikola omaunongo gi ili nogi ili, unene tuu Uuwindjinia nomaunongononi gokunongonona mo nawa iinima nokushiwa okushita iinima ngashi iilongo iikwawo ya putuka. Omukokolipresidende ta ti, aatiligane oye tu dhina sho inatu ilonga nawa. Ta indile koshigwana oshigundjuka shi ilonge sha mana mo unene iilongwa yuuindjinia mbyoka tayi longwa mOsikola yUuwindjinia mOngwediva nosho tuu. Yo aakuluntu taya tameke okuhita ootundi dhaakuluntu, uusiku nomutenya, opo ya ze ko konima yesiga.Ta indile kaavali naakuluntu ya paluthe nawa aanona yawo noku ya putudha wo nawa. ‘Moshilongo shetu omu na ongopolo, tayi vulu okushita iinima yongushu, ashike nee itatu vulu oku yi longitha oshoka inatu longwa, na oto adha nee aatiligane mboka oyo taya kutha mo Ongopolo yetu ye ke yi longithe tse tatu ka landa kuyo iinima mbyoka ya ningwa mongopolo yetu kuyo.Tu ilongeni utale ndele tatu longeni mo iinima yetu kutse yene opo katu kale we tatu pangelwa kuyalwe mboka noku tu kutha iinima yetu ta ya pitile mo EPA moka nosho tuu,’Omukokolipresidende ta ti ngawo nokugwedha po kutya aatiligane oya nika oshiponga. Oya hala okukutha ko Mugabe koshipundi notashi vulika okuza hoka taye ya ko Namibia, ya kuthe ko wo aaleli ya Namibia yoshili koshipundi. Omaimperiale taga dhipaga aantu mo Iraq nomoAfghanistana moka, ndele iifokundaneki oya mwena ashike, itayi popi ko sha. Uuthemba wOmuntu nUudemokoli watya ngiini ngawo? Omukokolipresidende ta pula ngawo nokutumbula wo kutya Aandoishi nayo oya dhipaga Aanamibia yAaherero noku umbila omuti ngoka oomeme yAaherero itaya mono we uunona oundji. ‘Kaye li nawa aantu mboka. ‘Inandi hala aantu taya popi nayi Pohamba, Omupresidende gwaNamibia ngoka e li omwiinekelwa gwOswapo omunene. E li oye Kapitaholo nokwiilongekidha okupangela Namibia muule woomvula ntano tadhi landula. Onkee oshigwana nashi ke mu hogolole natango noku mu pa oonkondo dhokukatsikila okupangela Namibia. Shi ka hogolole aahogololwa yOswapo ayehe 72 nokugwedha po wo yamwe mboka ya valwa konima yemanguluko, opo Omutumba gwOpashigwana gu kale gwa thikama ashike miilyo yOswapo opuwo.