NSHR ita tonatele we omahogololo ECN ta ti

EHANGANO lyUuthemba womuntu wopashigwana[NSHR] olya patelwa pondje mokutonatela omahogololo getitano nolyomakaya oshiwike shi.
Omweelo nguka ehangano ndika ota shi vulika li thiminike gu egululwe ishewe ngele olya tokola okuya kompangu,oku yi indila yi kaleke etokolo ndika lyo Komisi yomahogololo.

Oonzo dhi shi kwiinekelwa odha ti okomisi yomahogololo ya Namibia oya tokola oku kutha po uuthemba wa NSHR okutonatela omahogololo molwaashoka aniwa ehangano ndika olya luudhike omutalelo gwoKomisi muuyuni sho lya popi dha nakalindi kombinga yembo lyaahogololi.Omukuluntupitithi gwehangano lyuuthemba womuntu, Phil ya Nangolo okwa koleke kutya okwa mona omushangwa ngoka tagu popi kutya NSHR uuthemba wokutonatela omahogololo okwe wu kuthwa. Ndele Ya Nangolo okwa ti etokolo ndika ite li taamba ashike ngaaka ndele ote ke li kondjitha noongolo dhomaako.’Ompito yimwe tu na okukondjitha etokolo ndyoka, oku pitila mompangu.Ompango ota yi ti opena oku kala epulakeno, oku gandja ompito kongundu ya gumwa koshinima shika, yi tye sha, omanga etokolo oku yi dhilika inaa li ningwa. Ka twa li twa pewa ompito ndjoka’, Ya Nangolo ta ulike.Etokolo lyoKomisi yomahogololo olya landula sho NSHR ya gandja omushangwa gwoonkundana oshiwike sha yi ta gu ti opena omapuko giigalala membo lyomadhina gaahogololi.Ehangano ndika olya tile embo lyaahogololi oli na omapuko nayi, ngaashi aniwa aahogololi 132 mboka inaa ya adha okuhogolola, na aniwa 103 mboka yi ishangitha lwaali, naahogololi 12 yi ishangitha aniwa konima sho omaishangitho gahulu mo 30 ga Septemba 2009.Okomisi yomahogololo oya li ya yamukula oNSHR momushangwa Osoondaha ya ti, ehangano ndika oli na elalakano oku pukitha aantu noku itaalitha aatonateli yopaigwana kutya omulandu gwomahogololo moNamibia ota gu vulu okufukilwa.Ya Nangolo okwa ti okomisi yomahogololo oya lundile ehangano lye kutya ota li pukitha oshigwana naatonateli yomahogololo yopagwana owina.’Oya ti tse otatu kambadhala aniwa oku ya thaneka ya fa kaa ye shi kwiinekelwa nokaana uuyuki’.Onkundana yokutendwamo kwaNSHR momusholondondo gwaa tonateli yomahogololo ogwa taambwa ashike ootundi dhontumba konima sho omunashipundi shoKomisi yomahogololo, Victor Tonchi a londodha aatonateli yomahogololo yopaigwana ya takamithe aapopyapopyi yamwe mboka ta ya popyaapopya nomalakano oyo ayeke yega shi.Okwa ti Okomisi yomahogololo oya yalula, oshinakugwanithwa shoka omahangano gaakwashigwana gena, ndele moNamibia gamwe gomwaangaka oga ninga aalondodhi noshowo aahadhahadhi yomulandu pehala lyokukala aayambidhidhi moshilonga shika.’Okulondodha inaa ku pumbiwa ethimbo limwe ota shi vulika ku indjipaleke uunkundi wehalo lyokuhogolola mokati kaahogololi, shika ota shi vulu woo okwiindjipaleka ehilathano lyopapolitika.Shika ota shi vulika ishewe shi fale mehepeko lyiimaliwa molupe lwo ku yalulula omawi noshowo oku ya kompangu’, osho a ti.Okomisi yomahogololo momushangwa gwayo mosoondaha oya ti opwa fa pena elongelokumwe pokati koNSHR nongundu yimwe yaandhoka ta dhi thigathanapo momahogololo, naashika osha tukula omaipulo kutya ehangano ndika ina li gama nando ombinga ya sha ongo omutonateli gwomahogololo.Molwa onkalo ndjika shika ota shi ulike kutya ehangano ndika ita li vulu okwiinekelwa ongo li shi kwiinekelwa, li nuuyuki, lyi li puuyelele, inaa li gama mbinga ongo omutonateli gwomahogololi.