Nored okuuvite nayi koongodhi dhe dholusheno tadhi yakwa po

NORED okwa gandja e yenyeto lye ta ti ke uvite nande we nawa omolwoondhalete dhe dholusheno tadhi uhala tadhi yakwa po kookalyamupombo okuza tuu nuumvo mu Febuluali 2009.

•OSWALD SHIVUTE
Nored, pamupopiliko gwe Herma Ngasia, ta ti kutya oongodhi dhe otadhi yakwa unene momikunda ngashi Iihongo, Onankali noshwo mUunghete mIikandjohogololo sha Nayena nosha Nyaanya, Ngasia ta ti sigo oompaka Nored okwa kanitha nale oondhalate ndhika
dhongushu yOondola/N$66 848.00. Ngasia ta ti kutya oya kanitha oondhalate dhoometa 400, noshowo 500 dhOleina yo ABC noshowo dholaina yimwe dhoometa 288, shoka sha thigi aakwashigwana momikunda moka yaa na we olusheno.
Nored ota ti kutya otaka gandja ondjambi yOondola/N$3000.00 kwaangoka ta ka gandja uuyelele kutya olye a yaka po oon dhalate ndhoka na odhi li peni. Ngasia ta ti kutya kehe ngoka wu na uuyelele moshinima shika kala wa monathana nOmbelewa onene ya Nored pOndangwa nenge kOpolisi yi li popepi nangoye.
Ngasia ta gwedha po kutya Nored, Ehangano lyokugandja olusheno kiitopolwa yokoNooli, okuuvite nayi noku na omaipulo omanene kombinga yomiyonena tadhi mu ningilwa dhokuyaka po oondhalate dhe ngeyi.
Ta ti kutya oshinima shika osha etela notashi ka etela oonakushininga oshiponga nokutula wo oshigwana shaahoka monkalo ombwinayi.Ngasia ta ti ngele osho tashi tsikile ngawo nena otashi vulika shi ka kuthe Nored omukumo gwetsikilo lyokutula ko nenge okugandja olusheno komikunda hoka, okuninga shapo aakalimo yokomikunda hoka oyo yene taya ka landa nokufuta oondhalate dha yakwa ko nokufuta eshunoko lyolusheno ishewe.
Ngasia ta ti okuza nale, Nored oye a kala ta shununa ko oondhalate ndhoka hadhi yakwapo, ashike nee pethimbo ndika okwa fa e uvite kutya ite ke shi ninga we, okuninga aakwashigwana taya ka longela kumwe nokukwatitha ookalyamupombo mboka kOpolisi.
Ta ti wo kutya itaka konekisa olusheno koohandimwe nonando ye na oondhalate dhawo yene dholusheno, kakele ashike kwaamboka taya landa kOokampani dholusheno, nota ye shi ningilwa kOokampani ndhoka dhi shi oku shi ninga.
Ngasia ta ti aakwashigwana nayi ikelele kokulanda oondhalate dha yakwa nokukembadhala yi itulile mo omalusheno yoyene momahgumbo gawo nenge moongeshefa dhawo, ano taya henuka okulanda oondhalate niikwamalusheno kOokampani nenge koongeshefa ndhoka dhi na uuthemba woku dhi landitha.
‘Kehe ngoka to ka adhika wu na oondhalate ndhoka, kutya nee owe dhi landa kulye, ou na okulandulwa naangoka nee ino hala okulandulwa nokukwatwa, lopota ngoka te ya e ku landithe oondhalate ndhoka kOpolisi a kwatwe po,’Ngasia ta ti nokugwedha po ta ti uufuthi watya ngayi otau vulu ashike okumwenekwa uuna aakwashigwana taya etha po okulanda oondhalate ndhika dha yakwa.
Ngele oshigwana otashi tsikile noku dhi landa nena nashi kale sha yela mo nawa kutya ookalyamupombo onkee taya tsuwa omukumo notaya tsikile nokuyaka oondhalate niikwamalusheno ya Nored noyoshigwana ngeyi. Ano, onkalo yatya ngeyi oltayi vulu ashike okukalwa moshipala uuna aakwashigwana taya longele kumwe nOpolisi.
Ngasia ota ti oshigwna inashi tila nande okuya shi lopote uufuthi mbuka kOpolisi molwashoka nakulopota a tya ngawo ota kala e li lela megameno. Tashi ti Opolisi kayi na esiku yi ka gandje uuyelele kutya olye a lopota ngawo. Ngasia ota ti Epan gelo olya kondja notali kondjo noonkondo okugandja olusheno koshigwana noshigwana oshi na nee okwiitula mo nokugamenena po om aliko gasho nEpangelo ngaka.
Ta ti ngele omayako ngaka otaga tsikile nena kondjodhi yomumbvo 2030, oshigwana itashi ka thika ko shi na omalusheno giihanena noshitopolwa nenge noshilongo ashihe, oshoka manga Epangelo tali tula olusheno moshigwana, ookalyamupombo otaya yaka mo oondhalate, oopaala dhalwo nosho tuu.
Nored ota indile nee kAalei yOpamuthigululwakalo, yOpashigwana noyOongeleka ya kondje pamwe nEpan gelo mekelelo lyuufuthi watya ngeyi. Nored okwa ninga wo ekunkililo enene lya thinda maahingi yiihauto moka kutya naya hinge nawa na inayi idhenga we moopaala dhoondhalate dholusheno moondoolopa moka noshowo momiunda moka, oshoka oopaala dholusheno nhoka odho tadhi gandja uuelele koondoolopa, komapaandaanda gomoondoolopa moka.
Onkee ano Nored ta ti, nakuhingwe nawa iihauto na nakuhulithwe po omambonyagulopo goopaala dhomalusheno, unene tuu moondoolopa moka nomomikunda moka.Ngasia ta ti ekkumagidho ndika Nored ote li ningi shi ikwatelela komambonyagulopo goopaala dholusheno moondoolopa ngashi Ondangwa nOngwediva moshitopolwa sha Shana omathimbo ga zi ko.
Ngasia ta ti Nored ota dhilaadhila okutula po omageelo omanene kwamaboma taye kiimonekitha ondjo moshinima shika na inakudhilaadhilwa kutya omuntu oto pumu po ashike oopala dha Nored ngawo nokufadhuka po ndele opuwo ito landulwa. Ta ti kehe ngoka to ka ngwamuna po oopala dholusheno dha Nored, kala wi ilopota nziya kOpolisi noshowo ku Nored nokElelo lyondoolopa ndjoka.
Nored ngoka ta pandula ayehe mboka haya longele kumwe nokulopota ookalyamupombo nenge okwiilopota uuna ya pogola ngeyi, ota ti kutya oshinima shokukwatela po omaliko gEpangelo nosho tuu oshinakugwanithwa po sha kehe omukwanshigwana noshigwana oshi na okutsikila tashi tonatele nokukaleka po omaliko gEpangelo nogasho shene. Ta ti omambonyono po goopala dholusheno moondoolopa ohashi zi unene pokuhingilila kwaahingi yamwe nokuhinga nuuhasha.
Ngasia ta ti mOndangwa lwopOmwandi gwa Kamanya lwaampoka, pethimbo lyOpaasa, omuhingi gumwe okwa hinga neendelelo nonuuhasha ndele ta mbonyagula po omarobota gaampoka nokufadhuka po. Nashi kale nee ssha yela, Ngasia ta ti, kutya kehe ngoka to ka
mbonyagula po iikwamalusheno mbika, komeho oto ka pulwa wu yi opalekulule noku yi futa.
Nored ta pandula elonhgelokumwe lyOpolisi na Nored noshowo lyOmalelo
goondoolopa nokwa indile li tsikile ngawo.