Nored naye okwa yambidhidha Omaulikilo gIikwaipindi mEenhana

OKAMPANI yokugandja olusheno koshigwana mOnooli ya tseyika nawa nedhina Nored nayo oya kwathela kwali Omaulikilo gIipindi pEenhana moshitopolwa sha Hangwena ngoka ga li ko okuza meti 26 Juni 2009 sigo ometi 4 Juli 2009 noga li ga kalwa kaanangeshefa oyendji yomoshitopolwa sha Hanagwena noshowo kIitopolwa yilwe nopondje yoshilongo.

Pethimbo ta gandja Otjeke yawo ndjika yOondola/N$11,500 kOkomitiye ndjoka ya li ya unganeke Omaulikilo gIipindi ngaka, ndjoka ya li ya taambwa ko kOmupehakuluntu gwondoolopa ya Eenhana tate Paulus Mwandingi, pethimbo lyIitelekela yOshituthi shEgandjo lyOondjambi kOonakuulikanawa Iikwapindi yawo, Omupehakuluntu gwa Nored meme Kakwali Shoombe,ngoka a li a ende pamwe nOmugandi gwUuyelele wu na sha nOkampani ya Nored tate Frans Niikondo, okwa ti kutya okuuvite uugumbo okugandja omagano gOshimaliwa sho N$11,500 kOmaulikilo gIikwaipindi ga Eenhana, unene sho Nored a mona ompito ndjika yokugalulila sha moshigwana shoka haya kula noshi li ookastoma dhe. Shoombe ta ti Nored ngoka oye e li Okampani yotango yokugandja olusheno kuyoyene mo Namibia noshowo mUumbugantu wAafrika nokuli, okwa tokola okukwathela oshigwana moompumbwe dhi ili nodhi ili, ngashi te shi ningi ngeyi okupitila mOmaulikilo gOpaipindi. Ta ti Nored ye mwene ota longo e li kohi yomashongo omanene, molwashoka ota longo mOshitopolwa oshinene shoka sha kala sha dhiniwa notashi vulika osho shi li konima mehumokomeho noshina mboka haya mono iiyemo yi li pevi. Nored mokulonga moshitopolwa shatya ngawo oku na omashongo ngashi mokugwedhela ondando yolusheno lwe molwashoka oku na oku shi ninga opo a endele pamwe nethimbo kutya uuna to gandja omayakulo koshigwana, ou na okukala wo wu na oshimaliwa shoka shi na okukala tashi zi moonzo dhontumba nodhongandi. Ta ti wo kutya oku na uupyakadhi womaliko ge ngashi oondhalate noopaala tadhi uhala tadhi teywa po nokuyakwa po. Shoombe ta ti ngashi omvula ndjika moshitopolea sha Shikoto omwa yonagulwa nomwa yakwa omaliko ga Nored gongushu yOoN$60,000.00. Me Shoombe ta indile koshigwana shi longele kumwe na Nored meungaungo niimbuluma yatya ngeyi opo mboka ta ye yi ningi ya kelelwe oku yi ninga oshoka otayi kanitha eliko lya Nored ndyoka wo li li eliko lyoshigwana.’Tse otu shi lela oshinakugwanithwa shetu shegandjo lyolusheno koshigwana pakwatathano naashoka shi na okukala sha adhika okuthika momumvo 2030, onkee otwi itula mo noonkondo meyambulopo lyegandjo lyolusheno koshigwana lyatya shoo,’ Shoombe ta ti ngawo nokugwedha po ta ti kutya Nored ye mwene nande ongawo omaunkundi ngoka ge li po megandjo lyolusheno koshigwana oku ga wete nota kembadhala ngashi ta vulu oku ga kandula po nenge oku ga ninga omahwepo.