NHE ta futitha aantu ihohela oyindji unene

EHANGANO lyopashigwana lyokutunga nokulanditha omagumbo, National Housing Enterprises [NHE] olya lundilwa kutya otali kutha aayakulwa yalyo iihohela oyindji unene tuu mbyoka ha yi gwedhwa komwaalu gwomikuli dhomagumbo.

Aayakulwa yamwe ya NHE oya lundile ehangano ndika kutya ota li ya kunya unene moku ya futitha iihohela yapitilila, pehala aniwa lyoku ya kwathela oku kala yena omagumbo moka ha ya zi. Omuyakulwa gumwe gwa NHE okwa ti ye oha futu oodola omayovi 3 500 komwedhi , yo iihohela ya NHE komwaalu ngoka aniwa oyo oodola 1 600, onkene omwaalu ngoka omuntu nguka hafutu okumanitha egumbo, oyo ashike oodola 1 900, naambika okwa ti ina yi gwana okufutako egumbo lye uule womimvo ndhoka a pewa nenge ndhoka ena natango oonkondo dhokulonga , omuyakulwa gwa NHE nguka okwa shanga oshinima shika metumwalaka ehupi ndyoka a tumine koThe Namibian okupitila mo e-mail. Okwa tsikile a ti olukalwa nenge egumbo uuthemba wopantu noshowo oshimwe shiipumbiwa yesiku kehe yomuntu. Onkene epangelo olya pumbwa okutalulula ondjele nomuthika gwiihohela mbyoka hayi pulwa koombaanga komikuli dhomagumbo. Meyamukulo omupopiliko gwa NHE, Gladwin Groenewaldt okwa ti ondjele yiihohela oha yi londo nokuya pevi ethimbo nethimbo . Okwa ti oya pumbwa okutsakanena nomuyakulwa ngoka opo ya kundathane naye, noku mu fatululila kombinga yiihohela mbyoka.Groenewaldt okwa ulike kutya enyenyeto ndyoka olya taambwa kehangano lye.