Nghaamwa ta ti oondjila noontopa na dhi longwe nawa

GAVENA yOhangwena, Usko Nghaamwa okuuvitile nayi Oshikondo shOondjila moNamibia sho shi na Oindjinia nAatungi yOondjila taya tungu oondjila dha nkundipala no dhombiliha tadhi uhala ashike tadhi mana po oshimaliwa shEpangelo moku dhi tungulula kehe omvula.

Ndhika, Nghaamwa okwe dhi popile moshigongi shOshikondo shOondjila (Road Authority) nOgavena nOokaansela yIitopolwa yomuumbangalntu wopokati nowokuuzilo mOshakati omasiku ga zi ko.Mbaka nayo oya gandja uusama kAathaneki nokAatungi yOondjila, haya tungu oondjila noontopa dha nkundipala noonkondo.Ngaamwa ta gandja omayele kOshikondo shOondjila kutya uuna tashi tungu, tashi tungulula nenge tashi wapalekulula ondjila nenge ontopa monooli, nashi kale hashi kundathana nAaleli yomiitopolwa moka opo yi ipe omayele.Okwa ti omeya gefundja ohaga endele mOhangwena okuzilila mo Angola nosha yela kutya osho, hashi mono iihuna unene. Ta ti osha pumbwa okutungwa oondjila noontopa dha kola, inadhi fa ndhoka hadhi tungwa mo pethimbo ndika, hadhi yonagulwa po nokuumeya uushona. Ta ti uuntopa noontopa moondjila dhoongalama moka, ngashi unene ndjoka yopokati kOmafo nOkambebe odha tungwa nayi. Okwatya ngaa inadhi yelekana. Ngele ohauto tayi matuka ko, otayi nuka notayi hala nokunyenga omuhingi.Gavena ya Hangwena ota ti oshigwana nasho oshi li po tashi dhimbulula kutya Oshikondo shOondjila, itashi tungu we oondjila dha kola, oshoka ohashi ya okunyenyeta kOogavena nokOokaansela yIitopolwa mIitopolwa yawo moka.Gavena Nghaamwa ta ti, omasiku ga zi ko kuye okwe yile okamatyona ke na yina a sila moshiponga shohauto pokati kondjila ya Hakafiya nOkankolo, taka ti kutya yina oku shi kuhinga nawa, na ngeno ondjila ndjoka oya tungilwe nawa ngeno otashi vulika yi na inaya melambo ndyoka lya eta oshiponga nokufaalela omwenyo gwe. Nghaamwa ta ti otashi vulika oshigwana shi ka pule shi futilwe oonakusa yasho mboka ya sila moondjila moka omoluuwinayi woondjila ndhoka. Nghaamwa ota ti nashi kale shi shiwike mo nawa kutya Epangelo halyo lya tunga oondjila noontopa ndhoka nayi, ihe oindjinia nOokoontraka ndhoka dha pewa iilonga mbyoka kEpangelo. Aantu mbaka, Nghaamwa ta ti, oyo ye na okulonga iilonga yawo nawa nonongushu ndjoka ya pumbiwa. Nghaamwa ta ti otashi kala oshiwanawa okutunga ondjila yimwe momumvo ya kola nawa, shi vulithe okutunga uundjila oundji pethimbo limwe wombiliha nohau yonagulwa po mbala kefundja.Nghaamwa ta indile wo ko Road Authority, ya sitope okuuhala taya ningi omauvaneko gokutunga oondjila mIitopolwa dho itadhi tungwa. Gavena ya Hangwena ta ti, oshigwana osha tameka oku ya pa oombedhi molu omauvaneko gokutunga oondjila mIikandjohogololo moka, ngoka haga ningwa go itaga tulwa miilonga. ‘ Ngele okwa ningwa euvaneko lyondjila tayi tungwa okuza pontumba okuuka kongandi, nayi tungwe shili, ihe haku uvaneka ashike nokumwena, wa fa omuntu ta soso omuntu omahoka komulungu.Ngoka a kelela manga pehala lyOmunambelewa Omukuluntupitithi gwOshikondo shIilonga omusamane, Conrad Lutombi, okwa tsa kumwe na Gavena Nghaamwa. Ta ti osho naanaa sha ithanitha oshigongi shoka ya kundathane onkalo yoondjila moshilongo naashoka shi na okuningwa po. Ta ti Oshikondo shawo shoka sha totelwe po momumvo 2000 nokupewa oshinakugwanithwa shokutunga oondjila noontopa moshilongo, oshe shi pondola okukaleka po oondjila dhookilometa omayovi omilongone nambali, moka dhi vulithe pomayovi gatano dhi li ndhoka dhoteya.