Ngaye inandi landitha po omukunda nande ngashi tashi popiwa: Shipepe

MWENE gwomukunda Ekuku popepi nOkatana mUukwambi moshitopolwa sha Shana tate Levi Shipepe, okwa ti ye ina landitha po omukunda gwe Ekuku kElelo lya Shakati ngashi tashi popiwa na ke na esiku e ke gu landithe po.

Omasiku ga zi ko aakalimo yuomomukunda Ekuku moNooli ya Shakati, ngoka gu li gumwe gwomomikunda dhi li meni lyoongamba dhondoolopa ya Shakati, oya kala aniwa ye uvite taku popiwa kutya mwene gwomukunda gwawo tate Levi Shipepe, okwa landitha po omukunda gwawo ku Muni gwa Shakati mu tulwe aantu yomomalukanda ga Shakati mboka haya adhika komeya gefundja, yo mboka ya kala mo nale yomagumbo gomiti, ano gopaShiwambo taya zi po pomahala gawo ngoka nokuyapukila ehumokomeho lyondoolopa.
Aakalimo taya ti kutya oya uva sha popiwa moRadio noshowo sha shangwa mOshifokundaneki shimwe shomoshilongo, sha popiwa aniwa ku Meya gwOndoolopa ya Shakati Me Katrina Shimbulu kutya mwene gwomukunda Ekuku okwa zimina omukunda gwe guyapukile ehumokomeho, ano omagumbo gomiti nomapya ga ze po mo mu tungwe omagumbo gopashinanena goongulu pathaneko lyondoolopa.
Ano tashi ti, mboka ye na mo omapya ye ga ethe po ya tembukile kulwe ku ili, naangoka a hala okukala pehala lye mpoka, a pewe po ashike Oplota nenge Ooplota nokutunga po egumbo lyongulu, ihe haku tsikile we mpoka negumbo lyomiti nepya, oshoka mpoka otapu kala pa ndoolopa.
Oshinima shika osha halula oyendji yomomukunda ngoka Ekuku sho ye shi uvu, nomEtine lya zi ko, oya ithana oshigongi shoka sha ningilwa poomwene gwomukunda ngoka Ekuku mpoka ya pula mwene gwomukunda gwawo tate Shipepe kutya oye tuu shili ta popiwa mOradio nomoshifo kutya okwa landitha po omukunda ku Muni gwa Shakati nenge hasho.
Aakalimo yamwe oya gandja uuyelele koshigongi shoka kutya momapya gawo omwa dhengelwa uutenda kElelo lya Shakati, sha yela kutya nani omapya gawo oga landithwa po nale ku Muni gwa Shakati, na omolwaasho ta dhengele uutenda we nombili mompaya gaakalimo.
Aakalimo nyamwe oya nyenyeta wo kutya omagumho gawo nomapya gawo oga landithwa po nale koonkondo, ano kashi shi pazimino lyawo.
Taya ti momagumbo moka omwa kala oothigwa kwali dha thigwa mo kaavali nokaakuluntu yawo sho ya mana oondjenda nangashiingeyi kaye na we mpoka taya ka kala ngele Muni okwa tameke oku ya tidha mo a tunge po omagumbo gaamboka taya tidhwa komeya pomahala gawo momudhingoloko gwa Shakati.
Aagundjuka ya li wo poshigongi mpoka, oya nyenyeta sho ya kala taya shangwa kuyamwe yomaakuluntu momukunda moka, ya fa taya longele kumwe na Muni nenge nElelo lyOpashikandjo shoka, yo kaye shi naanaa sho taya shangelwa.
Yamwe taya ti kutya omasiku ga zi ko sho taya shangwa Uukalata womahogololo oya shangwa naanaa sha yela kutya oye li moshitopolwa shondoolopa, molwashoka uukalata wawo owa shangwa taya hogolola pa Shikandjohogololo, ano Pashitopolwa noshowo pa ndoolopa.
‘Ngaye kandi na nande esiku limwe nda lombwelele Muni gwa Shakati kutya na kuthe po omukunda gwetu Ekuku, ano kandi na nande esiku limwe nda landitha po omukunda gwetweni nguka Ekuku mu Muni gwa Shakati, ngashi tamu ti mwe shi uva mOradio nenge mwe shi lesha mOshifo.
Ngaye kandi shi kutya mboka ye shi popya mOradio noku shi shanga mOshifo oye shi kutha peni,’ Shipepe ta lombwele yomomukunda gwe pegumbo lye mEtine lya zi ko ngawo.
Aakalimo oya kala tayi itala kiipala sho mwene gwomukunda gwawo ta popi ngawo noye mu pula kutya sho nee a lundilwa ngawo ku Meya Shimbulu nokoshifo, ota ningi po shike mpono.
Shipepe okwa uvanekele yomomukunda gwe kutya mEtitano lya zi ko ota piti a thinda kuMuni, ano ku Meya Shimbulu noshowo koshifo shoka, e ke ya pule kutya okwe ya
lombwelela peni kutya omukuda gwe okwe gu landitha po ku Muni gwa Shakati.
Kombinga yaamboka omagumbo gawo ga landithwa po, aakalimo yamwe oya gandja omayele kuyakwawo kutya naya ka konge ekwatho lyopaveta, ya galulilwe omahala gawo, oshoka oye ga kuthwa koonkondo, inaya futwa sha.
Uuyelele wumwe wa gandjwa moshigongi shoka, ou li ngeyi kutya Muni gwa Shakati, okwa hala okutidhaatidha aakalimo yomomikunda 14 dha dhingilila Oshakati, ano dhi li meni lyoongamba dhondoolopa, opo aakalimo yaamoka ya ze mo ya yapukile ehumokomeho lyondoolopa.
Aakalimo yomomikunda ndhoka, oya ti oya tota po okomitiyekalelipo yawo, ndjoka tayi kala tayi kundathana na Muni moshinima shokuza po kwawo, na otaya ka kala ya thikama mpoka kutya yo pomahla gawo itay zi po, nanhge otashi ke ya mpoka ya ze po nena Muni oku na oku ya futwa naanaa ngashi taya pula ya futwe.