Nena esiku lyekondjitho lyembugapalo muuyuni

NENA, (eti: 17 June 2009) – Esiku lyEkondjitho lyEmbugapalo mUuyuni na uuyuni auhe ota u dhimbulukwa esiku ndika.

Embugapalo lyevi ohali etwa kekepo lyomiti kaantu nosho wo koshikukuta shoka hashi eta iinamwenyo yi mane po iikulya, sigo pehala tapu kala ashik pwa toka.Molwashoka nee omiti nenge iihwa ohayi eta omvula, okuniwe eitaalo ndika kutya sho oomvula dha ninga ethimbo itadhi loko we nawa miilongo oyindji yAafrika, shika osha etwa kembugapalo onene mEnenevi ndika.Nuumvo, uuyuni auhe otau dhimbulukwa esiku ndika kohi yOtema: ‘Gamena Evi nOmeya – okukwashilipaleka onakuyiwa yetweni atuheni.’ Nande ongaaka, Namibia oku na otema ye yopaumwe tayi: ‘Gamena Evi lya Namibia nOmeya gamo.’ Oshituthi oshinene shokutyapula esiku ndika mu Namibia, oshi li ko ongula yonena (tashi tameke potundi ontimulongo) tashi ningilwa pOshoto shOmaunyanyudho po Zoo Park mOvenduka.Omupopi a simana Ominista yOmuidhingoloko nOmatalelopo, Netumbo Nandi-Ndaitwah. Aapopi yamwe oyo Omuwiliki gwopakathimbo gwa UNDP mu Namibia, Lebogang Motlana ota ka gandja oshipopiwa shEtsokumweuthano lyOpaigwana li na sha nEkondjitho lyEmbugapalo/United Nations Convention to Combat Desertification (UNCCD) omanga Clemence Tashaya ta ka tseyitha pambelewa ehangano lyaatoolinkundana mboka haya shanga kombinga yegameno lyuuntshitwe nuunamapya mu Namibia. Oshituthi shika osha longekidhwa kUuministeli wEgameno lyOmidhingoloko nOmatalelopo, palongelokumwe na UNDP, German Technical Co-orperation (GTZ), Desert Research Foundation of Namibia (DRFN), NamWater na Namibia Nature Foundation (NNF).