Nelulu a kuthwa manga miilonga a yapukile omakonaakono

EKUTHOMIILONGA lyOmunashipundi gwElelo lyAukwanyama, George Nelulu ngoka wo e li Elenga enene lya Eudaneko inali kwatela mo sha shimwe shi, ili kashi shi aniwa ashike okuyapukila omakonaakono ngoka tage mu ningilwa, sha zi mpoka sho mongundu yomalenga gElelo lyAukwanyama mu na gamwe ngoka tage mu pe uusama kutya okwiininga kayamukulwa, ha longitha aniwa iimaliwa nayi na ka etha Omukwaniilwa gwUukwanyama, Martha Mwadinomho Nelumbu a kale ha popi kuye mwene.

Ndhika odha popiwa ku , Nahas Ndevahoma, ngoka e li Amushanga gwOmukwaniilwa, Mwadinomho Nelumbu oshiwike sha yi. Ta ti mElelo omu na omalenga gamwe taga popile Elenga enene Nelulu iinima yontumba aniwa he yi ningi kayi li nawa noga kala nee ga hala kuningwe oshigongi, na Nelulu ko ku konaakonwe iinima mbyoka tayi mu popilwa, aniwa he yi ningi. Ndevahoma ta ti omolu omapopyo nee ngoka, Omukwaniilwa Nelumbu okwa tokola pu tulwe okakomitiye ka konaakone iinima mbyoka, osha yela nee kutya manga taku konaakonwa iinima mbyoka tayi popilwa Nelulu, ye oku na okukala manga pevi.Otaku tiwa kutya omalenga omanene ngoka ga kala ge li ompinge na Nelulu oge li gatano, kwa gwedhwa nee mwene gwomukunda, George Hikumwa. Okwa li kwa tiwa kutya omalenga ngoka gatano ogo,Sipora Dan gwoshikandjo sha Haingu, Hangula Vatilifa gwOshikandjo sha Kelemba, Amono Shipanga gwa Namutai, Johannes Moshana gwOshikandjo sha Mhedi nElenga enene lyOshikandjo sha Namhinda Paulus Dumeni.Omalenga ngaka kumwe nooyene yomikunda yamwe, oga kala nee taga ningi aniwa iigongi pethimbo lyOmagongo mpoka, pwa indikwa okuningwa iigongi, oshoka Elelo olya ya mOnghata, haku tiwa. Hayi ningwa aniwa nelalakano lyokukundathana iinima aniwa kayi li nawa hayi ningwa kElenga enene Nelulu noku indila li kuthwe miilonga. Pokati mpoka omalenga omanene gatatu, Dumeni, Shipanga na Moshana, oyi ikutha mo moshinima shika shokukondjitha, Nelulu nokugandja aniwa ombili kOmukwaniilwa. Ashike aniwa Omalenga omanene gaali, Sipora Dan gwOshikandjo shaHaingu nElenga enene lya Kelemba, Hangula Vatilifa kumwe na mwene gwomukunda gwa Ngha , George Hikumwa, oga kala ga dhama mpoka kutya Nelulu na pulakenwe mwaashoka ta fekelelwa. Otaku tiwa wo kutya mwene gwomukunda Ongha, Hikumwa nElenga enene lya Kelemba , Angula Vatilifa, oya kala hayi, iyakele kOkambo kOmbaanga kElelo lyAukwanyama ya tale shoka shi li ko yo ka ye na uuthemba woku shi ninga. Oshinima shika osha uvitha wo nee aniwa nayi Omukwaniilwa nElelo lye nOkomitiye ndjoka ya langekwa po kOmukwaniilwa yi konaakone Nelulu, oya tokola kutya nElenga enene Vatilifa na mwene gwomukunda Hikumwa nayo naya kuthwe miilonga kukonaakonwe wo iinima mbyoka ya ninga. Elenga enene lya Haingu Sipora Dan, naye okomityiye oya tokola a kuthwe manga miilonga molwashoka oha longele kumwe nElenga Vatilifa na Hikumwa. Okomitiye nee ndjoka oya tameka iilonga yayo yomakonaakono nongele oya mana otayi ka gandja oshizemo kOhamba, Mwadinomho Nelumbu yo yi tale nee kutya mboka ya kala taya konaakonwa otaya ningilwa shike.