NDF ta lalekemo aakwiita yamwe miilonga mboka yena uunkundi

OSHIKONDO Shegameno osha dhiladhila oku laleka konyala aakwiita yeli 132 iilyo yetanga lyegameno miilonga oshoka oyina uunkundi noshowo oyina uulema.

Omukuluntu gwoshimpungu shuunamiti metanga lyegameno nomoshikondo shegameno, Ndjayi, Sophia Ndeitunga okwa koleke kutya oshikondo she aluhe ohashi tala noku konakona uukolele wiilyo yasho omumvo kehe, naambyoka ya monika itaa yi vulu oha yi lalekwamo miilonga.Pamiyalu dha gandjwa momushangwahokololo gwokommissi yiilonga mepangelo yomumvo 2011/2012, aantu yeli yatano oya li ya lalekwa mo miilonga okuza moNDF ethimbo ndyoka.Omushangwa ogo tuu ngoka ogwa ulike kutya oshikondo shoka oshina iilyo yetanga lyegameno yili omayovi 18 119. Meindilo ndyoka uukitha koKabinete, Minista Yegameno, Charles Namoloh okwa ti oshikondo she osha gandja iilonga kaakondjelimanguluko oyendji noshowo kaanona ya valelwa mekondjelomanguluko.Okwa ti omwaalu gwaantu mboka kwa thanekwa ye na oku lalekwa miilonga ogundji, nokabinete ota ka tseyithilwa opo ka uveko onkalo nkene yili, kutya aluhe osha pumbiwa oku kuta aantu mboka taya gwanithapo iipumbiwa oku kutwa muukwiita, kokutya oyena oku kala nuukolele paunamiti, osho Namoloh a ulike meindilo lye. Namoloh okwa dhimbulutha woo okabinete kutya oshikondo she osha yulululako kiipumbiwa yimwe yoku taambelamo aaniilonga, mwakwatelwa naashoka she konakono lyopaunamiti tali konakona uundjolowele womwiindili. Ndele pethimbo lyomadheulo, iilyo yimwe kaya li ta yi longo ngaashi sha tegelelwa nolundji oya kala tayi ka talelapo oshipangelo. Iilyo mbika konima yoku manitha omadhewo gayo oya tulwa pomahala mpoka pwaana iilonga ya dhigupala, ndele nando ongawo onkalo yuukolele wayo inayi tyapo hwepo osho Namoloh a hokolola. Omautho gakwaalukehe gompango yiilonga mepangelo noshowo gompango yegameno otaga utha kutya iilyo otayi vulu okulalekwamo miilonga omolwuunkundi.Ongundu yuunamiti oya li ya tulwa kumwe mu Juli nuumvo oku konakona nawa uukolele wiilyo mbyoka 132. Pahapu dha Namoloh ongundu ndjika oya thaneke kutya iilyo 88 kayi na uukolele wa gwana opo yi tsikile muukwiita omolwa omavu ga yooloka noshowo omaulema gontumba. Omavu ngoka ya li yena ongaashi uuposi, uumbolo, edhengo lyomutima, uuwehame womaiyuvo, okankela nombanda. Omunawino miipambele yaaniilonga, Herbert Jauch okwa ti nonando NDF keli kohi yoveta yaaniilonga, uuna omuniilonga a kuthwa miilonga omolwuukolele wankundipala, ngoka oku na oku longekidhilwa ofuto omolwa onkalo ye noshowo omauwanawa galwe ngoka guuthwa koveta yaaniilonga moshinima shika.Namoloh okwa ti oshiketha shoopenzela dhaaniilonga yomepangelo nenge GIPF otashi ka soshimpwiyu kutya mbaka ya kuthwa miilonga omolwuunkundi oya pewa omauwanawa ngoka.Moshipopiwa she pethimbo ta gamene omutengenekwa miyalu dhoshikondo she 2012/2013 Namoloh okwa tile yo oya hala ashike aantu mboka yena uukolele oyo ya longele oshikondo shoka opo shi vule oku gwanithapo omalalakano gasho gopampango, onkene shika ohashi sile aluhe aantu yasho oshimpwiyu unene tuu uundjolowele wayo. Omathimbo ga piti opo omuntu a ninge oshilyo shetanga lyegameno lya Namibia oku na oku konakonwa opo a monike onkalo yuundjolowele we nekonakono ndika olya li lya kwatelamo ndyoka lyombuto .