Ndapuka ota kondjo opo aamene eebesha daye dongushu yeemiliyona N$5,1 diha ye nombaanga

Omunangeshefa woyeendifo Silas Ndapuka (78) oku li moita yopaveta nombaanga yoStandard Bank shi na sha nokukufwa eebesha daye kombaanga di li nhee dongushu yeemiliyona N$5,1.

Paife oha futu oStandard Bank oshimaliwa shi fike poN$60 000 komwedi opo a kaleke po eebesha daye.

Omikanda dombaanga odo da monika koThe Namibian oda ulika kutya omunhu umwe wedina Johannes Josua (43) okwa li a longekida okufuta eebesha daNdapuka.

Josua okwa ti okwa li e na eudafano lokulanda eebesha kuxekulu – Ndapuka.

Ombaanga yoStandard Bank momudo 2020 okwa li ya itavela okuwedela omukuli waJosua. Ashike nee, eshi kwa li a xulifa po okuwanifa po eudafano laye lokufuta omukuli ou, Standard Bank okwa tanaukila keebesha daNdapuka. Ndapuka oku na eetuwa da shaningufwa daye dopaumwene naado dongeshefa di li 68, omikanda dopambelewa osho da ti ngaho.

Standaed Bank okwa kufa ko eebesha nhee domeehato omu dongushu yeemiliyona N$5,1.

‘OMUKENGELELI’
Ndapuka ota longele kumwe nehangano lokwoongela eengunga ledina Quatile Tracing and Collections, olo la eta po eudafano lokufuta oshimaliwa shi fike poN$60 000 komwedi. “Josua, paumbudi, okwa li a longekida okufuta nokulanda oyeendifo komunhu wetu okupitila moStandard Bank,” Quartile Tracing and Collecting osho a ti ngaho momukanda.

“Ashike nee, Josua kakwa li a landifwa oyeendifo ei paushili, oo konima a dopa okufuta oimaliwa yombaanga. Eshi osha eta opo Standard Bank a mone omukanda okudja komhangu opo a kufulule ko oyeendifo ei komunhu wetu, oo kwa li ehe na eshiivo kutya oyeendifo yaye okwa li ya landifwa po paumbudi,” Ehangano osho la ti ngaho.

Ndapuka okwa patulula oshibofa shopolifi omwedi ou. Ekengelelo eli ola tameka vati momudo 2020. Okuniwe oumbada kutya Josua natango okwe lipyakidila nokuya komahanga akwao oshimaliwa.

EKENGELELO LOMBAANGA
Ehangano loQuartile Tracing and Collections okudja opo ola kala nokushangela omikanda komahangano ahapu oshimaliwa opo li kaleke osho tali ifana “ounanamwengu”.

Ola hokolola ekengelelo olo ngaashi tashi landula: “Josua okwa li a ya kuNdapuka ta ti okwa hala okulanda po eebesha dimwe odo ina hala vali. Ndapuka okwa itavela, ashike inava popya nee vali ondado okudja opo.

“Mepakumo leisho, eemiliyona dimwe okwa li da tuminwa kombaanga yaNdapuka. Josua divadiva okwa lombwela Ndapuka kutya ina hala vali eebesha.

“Ndapuka okwa futa oshimaliwa kuJosua. Eshi Ndapuka a ka mona kutya ekengelelo lombaanga, okwa kaanyena oshimaliwa shi fike poN$400 000. Ashike atushe otu shi shi kutya ombudi kai na noN$400 000 konima ya ya neemiliyona.”

Josua oshiveke sha dja ko okwa lombwela oThe Namibia kutya xekulu kakwa li ta popi oshili. “Oimaliwa okwa li ya tuminwa kombaanga yaye. Okwa shaina nokushaina. Okwa ka ninguluka ashike konima yefimbo, ta ti oshimaliwa kakwa li sha wana,” Osho a ti ngaho. Ashike nande ongaho, omikanda dombaanga oda ulika kutya Josua oye ashike kwa li a shaina. Eshi Standard Bank a kufa onghatu yopaveta yokukufa ko eebesha, omadina oo a tumbulwa momikanda oyoo ashike aJosua nehangano laye ledina J Kamaku Trading Enterprises.