NBC popepi no ku mona omuwiliki

OLUKONGO lwomuwiliki omupe gwehangano lyokutuma omawi mombepo lya Namibia[NBC] olwa ya komeho, na ngashingeyi opena aawiliki yatatu momahangano ya tulwa momusholondondo gomapulo.

Oonzo popepi no NBC ota dhi ti ewilikongundu lyehangano ndika olya hala okumanitha iilonga yoku ulika omuwiliki omupe gwoNBC.
Mboka ta ku tiwa oye li momusholondondo gwoku ninga aawiliki yoNBC tashi vulika oyo, Stanley Similo omuwiliki gwoonzo dhopantu mehangano lya Leo lyoongodhi, omuwiliki gwomakwatathano mombaanga ya Nedbank omusamane , Rector Mutelo nomuwiliki gwomakwatathano mehangano lyoongodhi dhopeke lya MTC, omusamane, Albertus Aochamub.
Similo na Mutelo ayehe oyo aaniilonga aakulu moNBC ya li pomahala guuwiliki omanene.Aochamub ota ku tiwa oye tashi vulika a pewe iilonga mbika.Oonzo popepi no NBC ota dhi ti Aochamub ina ninga eindilo konima sho a tindile okutaamba iilonga mbika omumvo gwa yi molwaashoka ondjambi ndjoka a li ta pewa okwa li oshona.Opwa itaalwa kutya Aochamub okwa kongwa, oshoka ominista yuuyelele, Joel Kaapanda, pamwe nomunashipundi shewilikongundu lyo NBC, Sven Thieme oye mu simaneka unene.
Sho a pulwa kombinga yoshinima shika , Thieme okwa ti ewilikongundu lye ita li tisha kusho sigo uuna ndoka euliko lyomuwiliki omupe lya manithwa.
Oonkundathana pokati ka Aochamub noNBC odha li dha ponyo mu May omumvo gwa yi konima sho a tindi okutaamba iilonga mbyoka sho a li a uvanekelwa ondjambi yoodola omiliona yimwe komumvo.
Ehangano lyoongodhi lya MTC ndyoka ha longele olya li lya gwedhele ondjambi ye opo li mu keelele keeli thigepo.
Epulo kombinga yondjambi ota li ka holoka ishewe, unene sho epangelo ta li kambadhala okushunitha pevi oondjambi dhaawiliki yomahangano gepangelo opo dhi kale dhithike pamwe nodhaaniilonga yomepangelo.
Edhina ekwawo ndyoka lya popiwa mekwatathano niilonga mbika yoNBC , olyo mu nambelelwa gwa NCCI, Tarah Shaanika. Ndele osha fa kutya nguka ina tulwa momusholondondo gwaa ulikwa mboka ta ya ka pula pulwa omolwa iilonga mbika.Okuza kemanguluko, aantu yeli omulongo oya kwatele komeho ehangano lyo NBC, ethimbo lyuudha nenge pakathimbo.
Mboka ye na uunongo owindji kombinga yehangano ndika ota ya ti okwaana ohokwe yo kwiindila iilonga yewiliko lyehangano ndika okwa etwa keidhopomo lyo papolitika, mewiliko lyo NBC.
Olukongo lwo ku ulika omuwiliki gwo NBC mu April nuumvo olwa kalekelwe molwaashoka, aniwa opwa li ehilathano pokati kewilikongundu nominista, Kaapanda kombinga yomuhogololwa.
Okwa li kwa popiw a pethimbo ndiyaka kutya , ewilikongundu olya lya hala oku gandja iilonga mbyoka komutoolinkundana gwoshifo sho Namibia Today, omusamane , Asser Ntinda, ndele Kaapanda ka li aniwa eshi uvitile ombili, Kaapanda okwa tindi omalundilo gatya ngaaka.